«2012 թվականի Բեռլինի արեւելյան մասում մենք հիմնադրեցինք ոչ առեւտրային՝ հանրօգուտ կազմակերպություն՝ «Եվրոպացիների եւ հայ մասնագետների ասոցիացիան», որի նպատակն էր միջառարկայական կապի միջոցներով տարաբնույթ հայապահպանման ծրագրեր իրագործումը»,-այսօր «Զարկերակ» մամուլի ակումբում ասաց Եվրոպացի եւ հայ մասնագետների ընկերություն ձեռնարկության տնօրեն Միքայել Մինասյանը:
Ըստ նրա՝ Բեռլինում ընկերությունը ունի հայկական դպրոց, եկեղեցի, որտեղ պատարագներ են անցկացվում կիրակի օրերին: «Մեր առջեւ ծառացած խնդիրներից մեկն այն էր, թե ինչպե՞ս ֆինանսավորենք հայապահպան գործունեությունը տեղում, որպեսզի հասցնենք արդյունավետ մակարդակի: Ստեղծվեց նաեւ շահույթ հետապնդող ընկերություն՝ «Եվրոպացի եւ հայ մասնագետների» ընկերություն, որի առարկան է առայժմ 4 լեզուներով ստեղծված սոցիալական ցանցը»,-նշեց պարոն Մինասյանը:
Նրա խոսքերով՝ այս միջոցով հնարավոր է ներկայացնել եւ համախմբել հայ մասնագետների եւ կազմակերպությունների ներուժը Եվրոպայի տարբեր երկրներում, Ռուսաստանում, Հայաստանում եւ Լեռնային Ղարաբաղում, որը իրականացվում է ինտերնետի միջոցով:
Պարոն Մինասյանը ներկայացրեց, որ www.eaexperts.eu կայքում մասնագետները կարող են օգտվել ռեզյումեների գրանցման եւ որոնման համակարգից: Այս 2 գործոնները՝ մասնագետների եւ կազմակերպությունների բազան, ըստ ընկերության տնօրենի, հնարավորություն է ընձեռում միմյանց հետ համագործակցելու, ինչպես նաեւ՝ տարբեր բնույթի ծրագրերի գրառման հնարավորություններ, աշխատատեղերի հայտագրերի ներգրավման, որոնման դաշտեր:
Կարդացեք նաև
Միքայել Մինասյանի խոսքերով՝ այս սոցիալական ցանցը երկու նպատակ է հետապնդում եւ առաքելությունն է լուծելու: Մի կողմից այն հավաքում է մասնագիտական մեծ բազա, որի միջոցով ցանկացած տեղ եւ ցանկացած հայ կարող է գնալով Գերմանիա կամ մի այլ երկիր՝ տեղեկանա, թե ի՞նչ հայ մասնագետի կարող է գտնել, մյուս կողմից՝ ստեղծված եկամուտները կարող են ներդնել սփյուռքում հայապահպանման եւ հայազարգացման գործի մեջ , որը, ըստ պարոն Մինասյանի, սփյուռքում խնդրահարույց հարց է եւ այս միջոցով կապիտալը կմնա հայերի մեջ:
Միքայել Մինասյանի ներկայացմամբ, այս պահին կայքում կան 50 –ից ավելի օգտատեր-մասնագետներ եւ 25 կազմակերպություններ, գործում է 7 ոլորտ եւ 18 բնագավառ՝ սկսած սպասարկումից՝ վերջացրած գյուղատնտեսությունից:
«Այս պահի դրությամբ Միացյալ Նահանգներից, Ռուսաստանից, Հայաստանի Հանրապետությունից օգտատերերը ավելի շատ են, իսկ Բեռլինից, որ նախատեսված էր՝ այդքան էլ մեծ չեն»,-նշեց պարոն Մինասյանը:
Անուշ ՄԱԹԵՎՈՍՅԱՆ
