Հուլիսի 15-ին Սյունիքի մարզի ընդհանուր իրավասության դատարանում նշանակվել էր «Վիրավորանք հասցնելու համար լրատվության նույն միջոցով հրապարակային ներողություն խնդրելու, զրպարտություն համարվող փաստացի տվյալները լրատվության նույն միջոցով հերքելու եւ փոխհատուցում վճարելու մասին» հայցով նախնական դատական նիստը:
Հայցվորը Գորիսի քաղաքապետի նախկին թեկնածու Տիգրան Կարապետյանն է, նրա ներկայացուցիչը՝ փաստաբան Տիգրան Մուրադյանը:
Պատասխանող է ճանաչվել ՀՀ Սյունիքի մարզպետի խորհրդական, Արցախյան ազատամարտի պահեստազորի գնդապետ Վոլոդյա Հովհաննիսյանը, երրորդ անձ է ճանաչվել «Առավոտ» ՍՊ ընկերությունը:
Հայցվորը պահանջում է Վոլոդյա Հովհաննիսյանից հրապարակային ներողություն խնդրել www.aravot.am-ում եւ որպես փոխհատուցում իրեն հասցված վիրավորանքի համար` պահանջում է նաեւ կես միլիոն ՀՀ դրամ գումար:
Կարդացեք նաև
Վոլոդյա Հովհաննիսյանը, ըստ հայցվորի, վիրավորական արտահայտություններ է թույլ տվել իր հասցեին, մասնավորապես` ասել է «ցինիկ ու լկտի մարդու կողմից», «իրենից ոչինչ չի ներկայացնում» եւ այլ արտահայտություններ «Սուրիկ Խաչատրյանին սպառնում են» մայիսի 12-ի հրապարակման մեջ:
Քաղաքապետի նախկին թեկնածուն մի պահանջ էլ ուներ. նա պահանջում է պատասխանողից մեր լրատվամիջոցի միջոցով հրապարակայնորեն հերքել «Մի ոչնչություն սպառնում է մարզպետի գլուխը ջարդելով» արտահայտությունը, որը ըստ նրա` զրպարտություն հանդիսացող փաստացի տվյալ է, եւ դրա համար էլ մեկ միլիոն դրամ փոխհատուցում է պահանջում:
Ի դեպ, մեր տեղեկություններով` դատարանում փաստաբանը հայցադիմումում միջնորդել է մեկուկես միլիոն հայցագնի չափով արգելանք դնել պատասխանողի գույքի վրա:
Նշյալ հրապարակումը, ըստ հայցվորի, կարդացվել է 4144 անգամ:
Հայցվորը դատարանին տեղեկացրել է, որ դիմել է նաեւ «Առավոտ» ՍՊ ընկերությանը` գրությամբ, որին լրատվամիջոցը պատասխանել է. «Հարգելի պարոն Կարապետյան, տեղեկացնում ենք Ձեզ, որ սույն թվականի մայիսի 12-ին www.aravot.am ինտերնետային կայքում տեղադրված «Սուրիկ Խաչատրյանին սպառնում են» վերնագրով հոդվածում Տաթեւիկ Հարությունյանի կողմից մեջբերված են բացառապես Վոլոդյա Հովհաննիսյանի խոսքերը: Ձեր նշված արտահայտությունների կապակցությամբ ձայնագրությունը պահպանված է»:
Ըստ հայցվորի` պատասխանողը իր արտահայտություններն անելիս հավասարակշռություն եւ բարեխղճություն չի դրսեւորել:
Դատական նախնական հաջորդ նիստը սեպտեմբերի 30-ին է:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
24.07.2015
