«iLur.am»-ի խմբագիր Քրիստինե Խանումյանի կարծիքով, դատախազությունն այլընտրանք, քան իր դեմ հարուցված քրեական գործի կարճումը, չի ունեցել:
Հիշեցնենք, որ Կենտրոն և Նորք-Մարաշ վարչական շրջանների դատախազության դատախազի որոշմամբ կարճվել է «Ստարտ-Մեդիա» ՍՊ ընկերության տնօրեն, «iLur.am» ինտերնետային կայքի խմբագիր Քրիստինե Խանումյանի նկատմամբ ՀՀ քրեական օրենսգրքի 353-րդ հոդվածի 2-րդ մասով (դատական ակտը դիտավորությամբ չկատարելը) հարուցված քրեական գործը:
«Իրենք այլընտրանք չունեին էլ, որովհետեւ ամբողջ իրավական պատմությունը կատարյալ աբսուրդ էր, ավելի մեծ գլխացավանքի մեջ կընկնեին, եթե այս գործը մինչեւ վերջ տանեին»,- ասաց «iLur.am»-ի խմբագիրը:
Ըստ նրա, իրավական որեւէ հիմք չկար այս գործը խորացնելու համար. «Սա ճնշում էր ե՛ւ լրատվամիջոցի, ինչու չէ ե՛ւ ճնշում խոսքի ազատությանը: Որովհետեւ մենք այս ամբողջ լրատվական դաշտի մի մասն ենք, եթե այսօր մեզ են ճնշում, վաղն էլ ձեզ ու ուրիշներին են ճնշելու»:
Կարդացեք նաև
Հիշեցնենք, որ Քրիստինե Խանումյանը մեղադրվում էր iLur.am- ում հրապարակված տեղեկատվության աղբյուրը դիտավորությամբ չբացահայտելու, կամ ավելի ստույգ՝ աղբյուրը բացահայտելու մասին դատական ակտը դիտավորյալ չկատարելու մեջ։
Արփինե ՍԻՄՈՆՅԱՆ
