Հուլիսի 24-ին ՀՀ նախագահ Սերժ Սարգսյանն աշխատանքային այցով մեկնել է Տավուշի մարզ: Նա Բերդ քաղաքում մասնակցեց նորոգված հիվանդանոցի բացման արարողությանը: Վերանորոգված բժշկական կենտրոնի բացումը խորհրդանշող ժապավենը կտրեցին առողջապահության նախարար Արմեն Մուրադյանը եւ Բերդի քաղաքապետ Հարություն Մանուչարյանը:
Նախագահ Սերժ Սարգսյանը, Տավուշի մարզպետ Հովիկ Աբովյանը, բարձրաստիճան այլ անձինք շրջեցին վերանորոգված հիվանդանոցի շենքում, ծանոթացան կատարված աշխատանքներին, բուժհիմնարկում ստեղծված պայմաններին : Համաշխարհային բանկի կողմից ֆինանսավորված վարկային ծրագրի շրջանակներում կատարվել են Բերդի ԲԿ-ի պոլիկլինիկական երկհարկանի եւ ինֆեկցիոն մեկ հարկանի մասնաշենքերի վերակառուցման, ինչպես նաեւ կցակառույցի շինարարության աշխատանքները: Դրանք կատարել է «Արտաշատշին» ՍՊԸ-ն:
Բերդի ԲԿ-ն հագեցել է բժշկական ժամանակակից տարբեր սարքավորումներով՝ բարձր արտադրողականություն ունեցող բազմաֆունկցիոնալ ռենտգեն համալիր, եռաչափ ուլտրաձայնային հետազոտման սարք, որը կարող է իրականացնել նաեւ սրտի եւ անոթների հետազոտություն, սպիրոմետր՝ ծրագրային փաթեթով, վիրահատարանի համար նախատեսված լուսատու, վիրահատական սեղան, լաբորատոր սարքեր, թոքերի արհեստական օդափոխության սարք եւ այլն: «Առողջապահական համալիրի արդիականացում» ծրագրի երկրորդ փուլի շրջանակներում Բերդի ԲԿ-ում կատարվել է 940,2 միլիոն դրամի ներդրում: Առողջապահության փոխնախարար Սերգեյ Խաչատրյանին ասացինք, որ Բերդի ԲԿ-ում մասնագետ բժիշկների պակաս կա, ինչպե՞ս է լուծվում այդ հարցը: Նա մատնացույց արեց Բերդի ԲԿ-ում վերջերս աշխատանքի ընդունված, ծագումով Բերդի տարածաշրջանից ջահել բժշկուհու եւ ասաց, որ տեղացի երիտասարդ բժիշկներն արդեն գալիս են հայրենի Բերդում աշխատելու, առաջիկայում նրանց կմիանա անզգայացնողի մասնագիտությամբ երիտասարդ բժիշկ:
Կարդացեք նաև
Նախագահ Սերժ Սարգսյանն այնուհետեւ այցելել է Վերին Կարմիրաղբյուր, որտեղ բացվել է մանկապարտեզի շենք: Գյուղի մանկապարտեզի նախկին, փայտաշեն շենքը կառուցվել էր 1923թ.: Մանկապարտեզի նոր շենքի շինարարությունը սկսվել է 1991-ին, սակայն այն անավարտ է մնացել: Դրա հիմքի վրա «Տավուշշին» ՍՊԸ-ն 119,8 միլիոն դրամ ֆինանսավորմամբ կառուցել է մանկապարտեզի շենք: Այն բաղկացած է երկհարկանի եւ մեկհարկանի մասնաշենքերից, որոնց ընդհանուր մակերեսը 453քմ է: Մանկապարտեզին հատկացվել է 5,2 միլիոն դրամի գույք: Մինչ մանկապարտեզի շենքի վերակառուցումը Վ. Կարմիր Աղբյուրում մանկապարտեզ է հաճախել 35 երեխա, շենքի վերակառուցման արդյունքում մանկապարտեզ կհաճախի 71 երեխա:
Սերժ Սարգսյանը հուլիսի 24-ին այցելել է նաեւ սահմանամերձ Չորաթան, ծանոթացել «Տավուշ տեքստիլ» ընկերության արտադրամասի աշխատանքներին:
Ծագումով Արծվաբերդ գյուղից ռուսաստանաբնակ գործարար Սուրեն Երիցյանի հիմնած «Տավուշ տեքստիլ» ՍՊԸ-ն այս տարի Չորաթան գյուղում ձեռք է բերել երկու կիսակառույց, խարխուլ վիճակում գտնվող անասնագոմ: Ներկայումս վերակառուցված մեկհարկանի արտադրամասի ընդհանուր մակերեսը 2000 քառակուսի մետր է: Ընկերությունն արդեն Չորաթանում ստեղծել է 50 աշխատատեղ՝ ամսական 100 հազար դրամ աշխատավարձով: Մեզ հետ զրույցում Չորաթանի գյուղապետ Վարուժան Բաղմանյանն արտադրամասի բացումը, աշխատատեղերի ստեղծումը սահմանամերձ գյուղի համար փրկություն համարեց: Չորաթանում օրական արտադրվում է 16 հազար զույգ ձեռնոց, որոնք արտահանվելու են Ռուսաստան եւ Բելոռուս: Արտադրամասի հարեւանությամբ վերակառուցվում է եւս մի արտադրամաս: Ընկերությունը նախատեսում է առաջիկա 5 տարիների ընթացքում Տավուշի մարզում կատարել 40 մլն ԱՄն դոլարի ներդրում, որից 5 միլիոնը՝ 2015-2016 թվականների ընթացքում: «Տավուշ տեքստիլ» ՍՊԸ-ն նախատեսում է առաջիկայում արտադրամասեր բացել մարզի Արծվաբերդ, Այգեձոր, Կողբ, Պառավաքար եւ Բերդ համայնքներում:
Տավուշի մարզի Բերդի տարածաշրջան Սերժ Սարգսյանի այցը լուսաբանում էին Հայաստանի հեռուստաընկերությունների, այլ լրատվամիջոցների շուրջ 30 լրագրողներ եւ հեռուստաօպերատորներ: Նախագահի լրատվական ծառայությունն ավտոմեքենաներով ապահովել էր լրագրողների մեկնումը Բերդ, Չորաթան, Վերին Կարմիր Աղբյուր: Լրագրողները՝ այդ թվում aravot.am-ի թղթակիցը, ՀՀ նախագահին եւ նրա հետ Բերդի տարածաշրջան այցելած պաշտոնյաներին տեսան միայն Բերդի բժշկական կենտրոնում, Չորաթան եւ Վ. Կարմիր Աղբյուր լրագրողների այցը նախագահի այցից ավելի վաղ էր կազմակերպվել:
Ոսկան ՍԱՐԳՍՅԱՆ
