Հայ մարզասերը հանրապետության ներսում եւ արտասահմանում մեր մարզիկների մասնակցության մասին ամբողջական պատկերացում կազմելու եւ տեղեկատվություն ստանալու կարիք ունի:
Բոլորը չէ, որ կարող են ներկա գտնվել թեկուզ Երեւանում անցկացվող հանրապետական առաջնություններին, առավել եւս՝ հետեւել այս կամ այն երկրում ընթացող միջազգային մրցումներում մեր հավաքական թիմերի բոլոր անդամների մրցելույթներին: Լավագույն դեպքում հատուկենտ հեռուստաալիքներ են ուղիղ միացում կազմակերպում հենակետային մարզաձեւերի Եվրոպայի եւ աշխարհի առաջնությունների եզրափակիչներից, որտեղ, հասկանալի է` ոչ բոլոր հայ մարզիկներն են հայտնվում: Այս թեմայով «Առավոտը» զրուցել է սպորտի նախարար Գաբրիել Ղազարյանի հետ:
Նրա համոզմամբ` Հայաստանը, լինելով մարզական զարգացած երկիր, պետք է ունենա մարզական ալիք, ինչը չկա, եւ դա մեծ բացթողում է եւ շատ տխուր երեւույթ:
– Ո՞րն է դրա պատճառը:
Կարդացեք նաև
– Պատճառները մի քանիսն են: Հայաստանում գործող գրեթե բոլոր հեռուստաալիքները մասնավոր են եւ գործում են իրենց բիզնես-ծրագրերի շրջանակներում: Նրանք, հավանաբար, մտածում են, որ սպորտը պահանջված չէ եւ ավելի լավ է` սերիալներ ցուցադրել: Ու չնայած մարզական կայքերի պակաս չկա եւ կարելի է մարզական ցանկացած տեղեկատվություն շատ արագ ստանալ, բայց դա էլ խնդրի լուծում չէ: Նախարարությունում այս հարցը շատ լուրջ քննարկել ենք: Հիմա համագործակցում ենք մի կազմակերպության հետ, որն արդեն սկսել է առայժմ ինտերնետային մարզական ալիք ստեղծելու աշխատանքները: Դա «Վիտամին» ակումբն է, որն, ի դեպ, աշխատում է շատ կոմպակտ ու հզոր տեխնիկայով:
– Ե՞րբ կարվեն առաջին քայլերը:
– Ուղիղ հեռարձակման մի քանի եթեր արդեն եղել է: Առցանց ցուցադրվել են հանրապետության մի քանի առաջնություններ եւ միջազգային մրցաշարեր, որոնց կարելի էր հետեւել Youtube-ով: Հիմա ավարտվում են մարզական կայք ստեղծելու աշխատանքները, որը կկոչվի «Վիտամին սպորտ»: Մեր մարզասերները հանրապետության տարածքում անցկացվող առաջնություններին, նշանակալի մարզական միջոցառումներին ինտերնետային 24-ժամյա ռեժիմով առցանց հետեւելու եւ տեսագրությունները դիտելու հնարավորություն հիմա էլ ունեն: Սա առաջին քայլն է Հայաստանում մարզական հեռուստաալիք ստեղծելու ճանապարհին:
– Մտահղացումը շատ լավն է: Իսկ հեռարձակման պատկերի որակը կապահովվի՞:
– Ասացի, որ նրանք ունեն շատ որակյալ տեխնիկա: Արդեն իրականացված ուղիղ հեռարձակումները բարձր որակի են, համապատասխանում են միջազգային չափորոշիչներին: Մնում է, որ հնարավորինս արագ յուրացվեն սպորտային հեռարձակումների նրբությունները՝ դրանք ավելի հետաքրքիր դարձնելու համար: Նախարարությունը խորհրդատվական ու գործնական բոլոր հարցերով աջակցելու եւ օգնելու է նրանց:
– Մի կարեւոր խնդրի մասին: Լինելու են համր ուղիղ հեռարձակումնե՞ր, թե՞ միջոցառումները նաեւ մեկնաբանվելու են:
– Դա ամենակարեւոր խնդիրներից մեկն է: Մեկնաբանություններ կան ու, իհարկե, լինելու են, ինչի մասին նույնպես մտածում եւ աշխատում ենք: Այս պահին կոնկրետ լուծումներ դեռ չկան: Կարծում եմ` առայժմ այդ գործը կարելի է վստահել փորձառու լրագրողներին եւ մարզաձեւերի մասնագետներին:
– Հայաստանում ամեն օր առաջնություններ չեն անցկացվում, մեր հավաքականներն էլ ամեն օր աշխարհի ու Եվրոպայի առաջնությունների չեն մասնակցում: Մնացած եթերաժամանակն ինչպե՞ս է լցվելու:
– Ալիքը, որ կոչվելու է «Vsport.am», հետեւելու է ոչ միայն մեծ սպորտին: Կլինի նաեւ լուրերի բաժին, որը պարբերաբար ոչ միայն Հայաստանի մարզասերներին, այլեւ ամբողջ աշխարհի հայությանն ամեն օր կտեղեկացնի հայկական սպորտին առնչվող ամենաթարմ իրադարձությունների մասին: Այն նաեւ մասսայական սպորտի եւ առողջ ապրելակերպի քարոզչի դեր է կատարելու՝ ցուցադրելով մարզական մասսայական միջոցառումները, օրինակ` Համահայկական խաղերը, ՀՀ նախագահի մրցանակի համար «Լավագույն մարզական ընտանիք» մրցույթը, հաշմանդամների մրցումները, մանկական սպորտլանդիաները եւ այլն: Կքարոզվեն նաեւ նախարարության կողմից իրականացվող ծրագրերը: Այնպես որ` 24-ժամյա եթեր ապահովելու հարցում, կարծում եմ, խնդիրներ չեն լինի:
ԱՇՈՏ ՀԱԿՈԲՅԱՆ
«Առավոտ» օրաթերթ
23.07.2015
