Այսօր ՀՀԿ ԳՄ նիստից հետո Էդուարդ Շարմազանովը լրագրողներին տեղեկացրեց, որ նիստում քննարկել են ներքաղաքական, ներկուսակցական հարցեր: Սերժ Սարգսյանը ներկայացրել է Դոնալդ Տուսկի հետ իր հանդիպման արդյունքները, Հայաստան-ԵՄ հարաբերությունները. «Տեսաք, որ պարոն Տուսկը Երեւանում հայտարարեց, որ ՀՀ անդամակցումը ԵՏՄ-ին ԵՄ գործընկերներն ընկալումով են վերաբերվում եւ պատրաստվում են աշխատել նոր իրավական փաստաթղթի վրա»: Սերժ Սարգսյանը նաեւ անդրադարձել է համանախագահների հետ հանդիպմանը:
Լրագրողները հետաքրքրվեցին, թե ինչպես է մեկնաբանում պարոն Շարմազանովը Սահմանադրական փոփոխությունների մասին առաջին նախագահ Լեւոն Տեր-Պետրոսյանի դիտարկումները: Շարմազանովը հարցին հարցով պատասխանեց՝ մեկնաբանեմ ո՞ւմ, ՀԱԿ-ի՞ն. «Որ ասում են Տեր-Պետրոսյան, ուրեմն Արուսն էլ հետն է (մեջբերելով «Հարսնացուն Հյուսիսից»-ից նկատի ուներ ՀԱԿ-ը):
Շարմազանովի խոսքերով՝ քաղաքական բազմակարծություն է, եւ չեն էլ ակնկալում, որ բոլոր քաղաքական ուժերը պետք է կողմ լինեն Սահմանադրական բարեփոխումներին. «Բայց բնականաբար չհամաձայնելով ՀԱԿ քաղաքական ուժի ներկայացրած թեզերի մեծամասնության հետ, այնուամենայնիվ պիտի նշեմ, որ ՀԱԿ-ը առաջընթաց է արձանագրել: Եթե նախկինում ՀԱԿ-ը մերժում էր Սահմանադրական բարեփոխումների շուրջ քննարկումը, ապա տեքստից հիմա մեջբերումներ անելը, վերլուծություններ անելը, իրավական գնահատականներ տալը նշանակում է, որ ՀԱԿ-ը մտել է բովանդակային քննարկման մեջ: Փաստն այն է, որ եթե նախկինում Տեր-Պետրոսյանն ու իր քաղաքական ուժը մերժում էին Սահմանադրական բարեփոխումների քննարկումն իսկ, այսօր արդեն իրենք քննարկում են: Իսկ այն, որ իրենք դեմ են բարեփոխումներին, իրենց կարծիքն է: Սա դեռեւս նախնական տարբերակն է»:
Շարմազանովը վստահեցրեց, որ «ՀՀԿ-ի համար ամեն գնով Սահմանադրական բարեփոխումներն անցկացնելը գերնպատակ չէ»:
Կարդացեք նաև
Հարցին՝ արդարադատության նախարարին ո՞վ է փոխարինելու՝ Շարմազանովը պատասխանեց, որ պաշտոնակատար կա, իսկ կադրային նոր նշանակման որեւէ հարց նիստում չի քննարկվել:
Հռիփսիմե ՋԵԲԵՋՅԱՆ
