ԱԺ ՀՀԿ խմբակցության պատգամավոր Կարինե Աճեմյանի համոզմամբ, Սահմանադրական փոփոխությունների փաթեթի կարևորագույն դրույթը կառավարման համակարգի փոփոխությանն է վերաբերվում:
Այսօր «Հայացք» ակումբում նա նկատեց, որ Սահմանադրական փոփոխությունների նախագծի մասին վերջին օրերին իրարամերժ կարծիքներ են հնչում, բայց կան կետեր, որոնք պարզապես ավելի հստակ ձեւակերպման կարիք ունեն. «Պետք է հասկանանք՝ կիսանախագահականից խորհրդարանական համակարգի անցումը նշանակում է գլոբալ փոփոխություն մեր քաղաքական կյանքում: Համարում եմ, որ այն դրույթները, որոնք արդեն հրապարակվել են, ներառում են ու հստակ ձեւով ձեւակերպում են այն մոտեցումները, որոնք վերաբերում են ԱԺ-ին, կառավարությանը, նախագահի ինստիտուտին, դատական համակարգին: Սա կառավարման մի մոդել է, որը եվրոպական երկրներում է գործում, համարում եմ առաջադեմ ու քաղաքակիրթ»,- ասաց պատգամավորը:
Քննադատություններին, թե ժողովրդին իրավունքից զրկելու Սահմանադրություն է, չհամաձայնեց. «Մեկ քայլ առաջ է, հասարակությունը մեկ ընտրության է մասնակցում, բայց դրանով ե՛ւ կառավարության դերն ենք բարձրացնում, ե՛ւ պատասխանատվությունը եւ հասարակությանը զերծ ենք պահում ցնցումներից:
Բոլոր քաղաքական ուժերն են ընտրելու վարչապետին եւ դժգոհ լինելու դեպքում կարող են անվստահություն հայտնել»:
Կարդացեք նաև
Հարցին, թե ինչու իշխանությունը հաշվի չի առել ընդդիմադիր ուժերի առաջարկները, տիկին Աճեմյանը պատասխանեց, որ մասնագիտական հանձնաժողով է աշխատում, որը համագործակցել է բոլոր ուժերի հետ: Նա ասաց, որ քաղաքական ուժերը հնարավորություն կունենան առաջարկներ ներկայացնել նաեւ ԱԺ-ում վերջնական նախագծի քննարկման ժամանակ:
Ինչ թերություններ է նկատել արդեն հրապարակված նախագծում հարցին, պատգամավորը պատասխանեց, որ թերեւս մարդու իրավունքներին վերաբերող դրույթները կարող էին ավելի հստակ ձեւակերպվել. «Մեծ փոփոխության առաջարկ չունեմ, որովհետեւ համարում եմ, որ վիճարկելի հարցերը պետք է նաեւ ընտրական օրենսգրքով կարգավորվեն»:
Իսկ նոր Սահմանադրությամբ միակուսակցական համակարգի հաստատման խնդիր պատգամավորը չի տեսել, նա չհամաձայնեց, որ մի կուսակցությանը բացարձակ իշխանություն կտրվի. «Պետք է կայացնենք խոշոր կուսակցություններին, սա լուրջ մոտեցում է քաղաքականության մեջ: Խոշոր կուսակցությունը մեծ պատասխանատվություն է իր վրա վերցնում, ՀՀԿ-ն կայացած կուսակցություն է»:
Ինչու հիմա սկսվեց սահմանադրական փոփոխությունների գործընթացը հարցին էլ, ասաց՝ արդեն քանի տարի է այդ մասին խոսվում էր, մի օր պետք է կատարվեր:
Արփինե ՍԻՄՈՆՅԱՆ
