Հայաստանի ասորական միությունների ֆեդերացիայի նախագահ Իրինա Գասպարյանը դեռ չի հասցրել ծանոթանալ Սահմանադրական փոփոխությունների նախագծին: Բայց ազգային փոքրամասնությունների վերաբերյալ փոփոխություններին ծանոթ է: Նա Aravot.am-ին ասաց, որ ԱԺ-ում ազգային փոքրամասնությունների ներգրավվածության եզդիների առաջարկը իրենց սրտով չէ ու այդ հարցի շուրջ եզդիների հետ շատ են վիճել:
«Ինձ թվում է, որ այդ քվոտաները շատ սխալ են, որովհետեւ մենք պատգամավորների, Ազգային ժողովի հետ արդեն աշխատում ենք: Մենք Հայաստանի քաղաքացի ենք եւ մեր քաղաքական, հասարակական գործունեության իրականացման հարցում համագործակցում ենք պատգամավորների հետ: Ունենք օրինակ, ԱԺ փոխնախագահ Շարմազանովը ազգությամբ հույն է, խորհրդարանում է: Հետեւաբար, ցանկացած փոքրամասնության ներկայացուցիչ կարող է ընդգրկվել ցանկերում: Եզդիներն են առաջարկել այդ հարցը, մենք ամեն անգամ իրենց հետ վիճել ենք, բացատրում էինք, որ դա պետք չէ, բայց իրենք համարում են քվոտա է պետք: Ինձ թվում է` ավելորդ է»,- ասաց Իրինա Գասպարյանը:
«Էլպիդա» հունական համայնքը ներկայացնող հունական ՀԿ-ների միության նախագահ Արկադի Խիտարովը, ընդհակառակը, ոգեւորված է եզդիների առաջարկությամբ: Նա դրական առաջընթաց է համարում ԱԺ-ում փոքրամասնության ներկայացուցիչների ներգրավվածությունը, պարզապես դեռ չի կարողանում հասկանալ՝ ինչ կարգով են ընտրվելու. «Մոտ իննը ազգային փոքրամասնություն կա Հայաստանում, չեմ կարողանում պատկերացնել՝ ինչպես են ներգրավվելու: Իհարկե, լավ կլինի, որ փոքրամասնություններից մարդ լինի այնտեղ, որ կարողանա մեր հարցերն ավելի լավ ներկայացնի: Չգիտեմ՝ քանակ կա՞, ինչպե՞ս, ինչքա՞ն են ընտրելու կամ ներգրավված լինել ինչ է նշանակում»:
Արկադի Խիտարովն էլ դեռ չի ծանոթացել սահմանադրական փոփոխությունների նախագծին եւ դեռ կարծիք չկարողացավ հայտնել:
Հայաստանի վրացական համայնքի ներկայացուցիչ Սվետլանա Նամչևաձեն էլ է կողմնակից ԱԺ-ում ներգրավված լինելու առաջարկին: Նա նույնպես ծանոթ չէ սահմանադրական փոփոխությունների նախագծին, այդ պատճառով սահմանափակվեց գնահատականների մասով: Հետո ասաց՝ գործող Սահմանադրությունից էլ դժգոհություններ չունի, ազգային փոքրամասնությունների շահերը, ըստ գործող սահմանադրության էլ սահմանափակ չեն:
Մեր հարցին ի՞նչ փոփոխություններ կուզեր տեսնել նոր Սահմանադրությունում, ասաց. «Մենք ուզում ենք այն, ինչ ուզում են բոլոր հայաստանցիները, որ երիտասարդները աշխատանք ունենան, այստեղից չգնան, որ համապատասխան պայմաններ լինի, այսքան բան»:
Արփինե ՍԻՄՈՆՅԱՆ
