Գարնան վերջին, ամռան սկզբին Տավուշի մարզում կանաչ ընկույզ են հավաքում, որից մուրաբա են պատրաստում, այն պահածոյացնում: Կան կանաչ ընկույզի մեծածախ գնորդներ, ովքեր այն կիլոգրամը 2000 դրամով գնելով այն քաղողներից, վերավաճառում են Հայաստանի այլ մարզերում, իրացնում պահածոների գործարաններին: Հունիս ամսին Բաղանիս գյուղում, Հայաստան-Վրաստան միջպետական ավտոճանապարհի եզրին կայանել է Իջեւանի տարածաշրջանի բնակչին պատկանող, «Մոսկվիչ» մակնիշի ավտոմեքենա:
Ավտոմեքենայից ելած մարդիկ սկսել են քաղել Բաղանիսի բնակչին պատկանող, ճանապարհի եզրին գտնվող ընկուզենու կանաչ ընկույզները: Բաղանիսի բնակիչները դա նկատել են: Իջեւանցիները ճողոպրել են, գյուղի մեկ այլ հատվածում մեքենան կանգնեցնելով՝ սկսել քաղել մեկ այլ բաղանիսցու ընկուզենու կանաչ բերքը:
Քիչ անց անցորդները նկատել,ահազանգել են ընկուզենու տիրոջը: Ընկույզի գողերը նորից փախուստի են դիմել: Նրանք Բաղանիս գյուղից ներքեւ, Ադրբեջանի սահմանին մոտ գտնվող լճակի մոտ սղոցով հատել են ընկուզենի ծառ՝ քաղելով կտրված ծառի ողջ բերքը:
Կանաչ ընկույզ մթերողներից շատերը կոտրում են ծառերի ճյուղերը, որպեսզի հետո ծառի ստվերում նստած՝ քաղեն ընկույզները: Ոմանք էլ ծառերն են բնից հատում: Նոյեմբերյանի տարածաշրջանի Գոգդաղ(Մեծասար), Գոմշավար, Դոնդար սարամասերում կանաչ ընկույզի համար հատված բազմաթիվ ընկուզենիներ կան: Այդ ծառը գրանցված է ՀՀ Կարմիր գրքում:
Կարդացեք նաև
Ոսկան ՍԱՐԳՍՅԱՆ
