Ինչո՞ւ «Օրանժ Արմենիան» մոտ 300 միլիոն դոլարի ներդրում անելով՝ 5 տարի հետո որոշեց 100% բաժնետոմսերը վաճառել Ucom-ին, արդյոք ճնշումներ եղե՞լ են ընկերության նկատմամբ, այսօր այս հարցերին ընկերության գլխավոր տնօրեն Ֆրանսիս Ժելիբտերը պատասխանեց, որ վաճառքի մասին որոշումը միայն ֆինանսական ասպեկտով չէ որոշված. Այն բիզնես որոշում է. «Երբ Օրանժը տարբեր երկրներում ներկայացված է լինում, ապա հարց է տալիս՝ արդյոք այդ երկրում լավագո՞ւյնն է եւ հնարավորությու՞ն ստեղծում է այդ երկրների համար զարգանալու: Հայաստանի պարագայում ընկերության զարգացման ավելի լավ հեռանկարներ կային բաժնետիրոջ փոփոխությամբ»:
Պարոն Ժելիբտերն ասաց, որ ճնշումներ չեն եղել ոչ ֆրանսիական, ոչ էլ հայկական կողմից:
Մանրամասն՝ տեսանյութում
Aravot.am-ի հարցերին՝ ո՞վ է առաջին քայլն արել՝ «Օրանժ Արմենիան» ի՞նքն է առաջարկել Ucom-ին գնել բաժնետոմսերը, թե հակառակը, եւ արդյոք Օրանժի ղեկավարությունը գիտի՞, թե ո՞վ է Ucom-ի սեփականատերը, ըստ ԶԼՄ-ների հրապարակումների, այն ֆինանսների նախարար Գագիկ Խաչատրյանն է, Ժելիբտերն ասաց՝ թե ով է սեփականատերը Ucom-ի, իրենց գործը չէ: Ինչ վերաբերում է թե ով է առաջինն առաջարկել գործարքի գնալ, Ժելիբտերն ասաց. «Լավ կլիներ Ucom-ից հարցնեիք, բայց առաջին քայլն իրենց կողմից է եղել, հաշվի առնելով այն հանգամանքը, որ իրենք պետք է շարժական կապի շուկայում գործունեություն ծավալեին»: Մանրամասն՝ տեսանյությում
Հարցին էլ՝ արդյոք ոչ շահութաբեր էր գործում ընկերությունը, ինչի պատճառով էլ որոշվեց բաժնետոմսերը վաճառել, ընկերության գլխավոր տնօրենն ասաց՝ «Օրանժ Արմենիայի գործառնական եկամուտները դրական են 2012 թվականից, եւ այլ հարց է, թե նոր ներդրումներ ներգրավելու պարագայում, արդյոք «Օրանժ Արմենիայի» մասնաբաժինը հնարավորություն կընձեռի այդ նոր ներդրումները վերադարձնել»: Ճշտող հարցին՝ առանց Օրանժի ներդրումների եւ օգնության «Օրանժ Արմենիան» եկամտաբեր կաշխատե՞ր , Ժելիբտերն ասաց. «Իհարկե՝ ոչ, առանց «Օրանժի» օգնության չէինք կարող: Այս 5 տարին բավարար չէր, որպեսզի կարողանայինք առանց օգնության, ինքնուրույն գոյատեւել: Այստեղ նոր ներդրումների դեպքում դրանց վերադարձելիության հարցն ակտուալ է դառնում»:
Նելլի ԲԱԲԱՅԱՆ
