«Թրանսփարենսի ինթերնեշնլ» հակակոռուպցիոն կենտրոնի գործադիր տնօրեն Վարուժան Հոկտանյանը հուլիսի 22-ին «Մեդիա կենտրոնում» լրագրողների հետ հանդիպման ընթացքում ներկայացրեց Օրինավորության ազգային համակարգի ուսումնասիրությունը: Ուսումնասիրվել են ԵՄ Արեւելյան գործընկերության երկրները, բացի Բելառուսից: Ուսումնասիրությունը ընդգրկում է 2013-2014 թվականները: Վարուժան Հոկտանյանը նկատեց, որ ի տարբերություն նախորդ ուսումնասիրությունների, տարածաշրջանային ուսումնասիրություն դեռ չէր արվել: Հայաստանում սա 3-րդ ուսումնասիրությունն է, իսկ Մոլդովայում եւ Ադրբեջանում առաջին անգամ է արվել:
«Կա 3 հիմնական խնդիր, որն ընդհանուր է: Առաջին հերթին՝ գործադիր իշխանության նկատմամբ զսպումների եւ հակակշիռների անբավարար լինելը, քաղաքականացված եւ անարդյունավետ դատական համակարգ եւ երրորդը՝ սահմանափակումներ քաղաքացիական հասարակության նկատմամբ: Այստեղ շեշտը հիմնականում Ադրբեջանի վրա է դրված, որոշ չափով Հայաստանի, մյուս երկրների դեպքում իրավիճակը համեմատաբար ավելի լավ է, չնայած՝ այնտեղ էլ նշվում է, որ ավելի բարվոք լինելը ավելի շատ գալիս է դրսի ֆինանսավորումից, ներսում այդպիսի աղբյուրներ առանձնապես չկան: Մյուս խնդիրը, որ նույնպես կա նաեւ այնտեղի քաղաքացիական հասարակության դեպքում, այն է, որ այնտեղ դեռեւս իշխանությունները, նամանավանդ, գործադիրը, շարունակում են այնքան էլ հաշվի չնստել քաղաքացիական հասարակության առաջարկությունների, պահանջների հետ»,- ասաց Վարուժան Հոկտանյանը:
Նրա խոսքերով՝ համեմատելով նախորդ հետազոտության հետ՝ առանձնակի լուրջ փոփոխություններ չեն արձանագրվել, հիմնականում նահանջ են ապրել դատական իշխանությունը, իրավապահ մարմինները եւ ընտրական համակարգը: Որոշակի թույլ առաջընթաց կա բիզնեսի, քաղաքացիական հասարակության, կուսակցությունների համակարգում:
Ամի ՉԻՉԱԿՅԱՆ
