ԱՄՆ Ֆլորիդա նահանգի Սարասոտա քաղաքում ապրող անտուն դաշնակահար Դոնալդ Գուլդը` Spring Arbor համալսարանից, օրերս 30.000 դոլար կրթաթոշակ է ստացել՝ երաժշտական կրթությունը ավարտին հասցնելու համար: USA Today-ի փոխանցմամբ` նա ժամանակին կիսատ էր թողել կրթությունը՝ միջոցներ չունենալու պատճառով: Ի դեպ, Գուլդը հայտնի է դարձել յութուբյան տեսահոլովակից հետո, որտեղ նա կատարում էր հանրահայտ Styx ռոք խմբի Come Sail Away հիթը: Անտուն երաժշտի տեսահոլովակը կարճ ժամանակահատվածում 11,5 մլն դիտում է «հավաքել»:
Դոնալդը ժամանակին երաժշտական կրթություն էր ստացել քոլեջում, որը ավարտել չի կարողացել, քանի որ կնոջ մահից հետո կորցրել է իրեն: Նրա մոտ կյանքի սեւ շրջան է սկսվել, ու արդեն տեւական ժամանակ է, որ 51-ամյա երաժիշտը անտուն է: Նա փողոցներում հանդես է գալիս իր լավագույն ընկերոջ՝ Փոլ Ռոնալդոյի հետ:
Ինչ վերաբերում է Spring Arbor համալսարանին, վերջինիս ղեկավարությունը հայտարարությամբ է հանդես եկել, որտեղ նշված է. «Գուլդը բացառիկ երաժշտական տաղանդ ունի, ու երաժշտական կրթությունը կփոխի նրա կյանքը»: Հավելենք, որ Գուլդին արդեն սափրել են ու պատշաճ տեսքի բերել, որով նա պետք է համալսարան հաճախի:
«Առավոտ» օրաթերթ
21.07.2015
