«Չորրորդ իշխանություն» թերթի լրագրող Անի Գեւորգյանին հուլիսի 19-ին ոստիկանության ներքին անվտանգության վարչությունից տեղեկացրել են, որ 2014 թվականի փետրվարի 12-ին իր նկատմամբ բռնություն կիրառելու, լրագրողական գործունեությունը խոչընդոտելու, ինչպես նաեւ ոստիկանության կենտրոնական բաժնում ապօրինի գործողություններ կատարելու վերաբերյալ տեղեկությունները չեն հիմնավորվել եւ հերքվել են նաեւ ՀՔԾ-ում իրականացված քրեական գործի նախաքննությամբ:
Ոստիկանության ներքին անվտանգության վարչությունում կատարված ծառայողական քննությամբ ոստիկանության ծառայողների կողմից կարգապահական խախտումներ թույլ տալու հանգամանքները եւս չեն հիմնավորվել, ուստի՝ ծառայողական քննության արդյունքները թողնվել են անհետեւանք:
Անի Գեւորգյանը Aravot.am-ի հետ զրույցում նկատեց, որ ծառայողական քննությունը տեւել է 1.5 տարի. «Ոստիկանության օպերատիվությունը տպավորիչ է: Լավ է 1.5 տարով ավարտվեց, թե չէ կարող էր տասնամյակներ էլ տեւել: Ոստիկանությունը սիրում է 25 տարի հետո հանցագործություններին անդրադառնալ»:
Լրագրողի խոսքերով՝ բռնություն կիրառելու, լրագրողական գործունեությունը խոչընդոտելու չէր կարող հաստատվել, որովհետեւ ոստիկանությունը չի կարող իր գործողություններում հանցագործություն հայտնաբերել: Անի Գեւորգյանը հավելեց, որ նույն գործով՝ քրեական գործի կարճման մասով, պատրաստվում է հայց ներկայացնել Մարդու իրավունքների եվրոպական դատարան:
Կարդացեք նաև
Հիշեցնենք՝ 2014 թվականի փետրվարի 12-ին, երբ ՀԱԿ ակտիվիստները Մաշտոցի պողոտայում իրազեկման ակցիա էին իրականացնում, որը խոչընդոտել են ՀՀԿ երիտասարդ անդամները: Միջադեպից հետո ոստիկանությունը բերման է ենթարկել ՀԱԿ ակտիվիստների, այդ թվում նաեւ Անի Գեւորգյանին: Անի Գեւորգյանի խոսքերով՝ ոստիկանության բաժանմունքում ոստիկանության կենտրոնական բաժանմունքի պետ Արտակ Պողոսյանը հարվածել է դեմքին, իսկ իրավախորհրդատու Սոնա Մելիքյանը իր տեսախցիկից հանել է հիշողության քարտը:
Ամի ՉԻՉԱԿՅԱՆ
