Քիչ առաջ ՀՀ վարչական դատարանում դատավոր Անի Հարությունյանը Վարդգես Գասպարիին դուրս արեց դատարանի դահլիճից: Եվ քանի որ Վարդգես Գասպարին կամովի չհեռացավ, նա հրահանգեց կարգադրիչներին ուժի դիմել եւ նրան դուրս անել: Կարգադրիչներն էլ Գասպարիի ձեռքերը բռնելով՝ նրան պառկած քաշ տալով հանեցին դատարանի դահլիճից:
Պատճառն այն էր, որ իր պաշտպանական ճառում Վարդգես Գասպարին մեջբերում արեց ոստիկանապետ Վլադիմիր Գասպարյանի խոսքերից: Նա ասաց, որ ոստիկանապետն իրեն վերջին սեռական հայհոյանքն է տվել. «Առանձնապես հիշում եմ հետեւյալը ….»,- ասաց Գասպարին եւ հայհոյանքն ամբողջությամբ հնչեցրեց դատարանում՝ ցույց տալու համար, թե ինչ բնույթի հայհոյանք է եղել: Դատավոր Անի Հարությունյանը Գասպարիի արարքը որակեց որպես անհարգալից վերաբերմունք դատարանի նկատմամբ եւ հորդորեց դուրս անել նրան:
Կարդացեք նաև
Գասպարին սկսեց բղավել. «Այն, ինչ դուք արել եք՝ պախարակելի չի՞, ընդամենը դրա հրապարակայնացո՞ւմն է սահմանված կարգի խախտում»:
Ըստ Գասպարիի պաշտպան Տիգրան Եգորյանի, Գասպարին տեղյակ չէր, որ այդ մեջբերման հրապարակումը դատարանում կարող է առաջացնել հետեւանք, ուստի խնդրեց վերանայել որոշումը՝ դատավորը մնաց անդրդվելի:
Գասպարին հայտարարեց. «Սա ոչ թե դատարան է, սա ոստիկանությանը կից կառույց է: Դուք ձեր դեմքով, ձեր անուն ազգանունով, ձեր ստորագրությամբ եք մաքրում այս ռեժիմի կեղտը: Դուք՝ դատավորներդ, ստորագույն սրիկա հանցագործներ եք: Դուք՝ դատավորներդ, պետք է գետինը մտնեք, Մարտի 1-ի հանցագործները մինչեւ հիմա չբացահայտված են մնում, որովհետեւ չեք գնահատում, որ այդ մարդիկ զրկվել են կյանքի իրավունքից: Դուք ամեն տարի 40-50 զինծառայողների սպանությունը պարտակում եք՝ ընդամենը ձեր կաշառքի բաժինն ունենալու համար, ձեր բարօրությունն ապահովելու համար»:
Գասպարին մի քանի րոպե պառկած մնաց դատական նիստերի դահլիճի մոտ: Նրա մոտով շտապ-շտապ հեռացավ դատավոր Անի Հարությունյանը՝ լսելով նրա վանկարկումները՝ սրիկա դատավորների մասին:
Հաջորդ դատական նիստը, որի ժամանակ հրապարակվելու է արդեն դատավորի որոշումը, նշանակվեց օգոստոսի 11-ին՝ 17.00-ին:
Հռիփսիմե ՋԵԲԵՋՅԱՆ
