Այսօր Վարչական դատարանում դատավոր Արման Թովմասյանի նախագահությամբ ոստիկանությունն ընդդեմ ակտիվիստ Վրեժ Զատիկյանի դատական գործի հերթական նիստն էր:
Հիշեցնենք, որ Վրեժ Զատիկյանը ոստիկանության բաժին բերման էր ենթարկվել 2013-ի սեպտեմբերի 5-ին՝ ՀՀԿ ԳՄ նիստի օրը ՀՀԿ գրասենյակի մոտ բողոքի ակցիա եւ երթ անելու ժամանակ: Ակցիայի մասնակիցներն այդ ժամանակ բողոքում էին Սերժ Սարգսյանի՝ սեպտեմբերի 3-ին՝ Մաքսային միությանն անդամակցելու հայտնի որոշման դեմ:
Ոստիկանությունը պահանջում է վարչական պատասխանատվության ենթարկել Զատիկյանին՝ Վարչական իրավախախտումների մասին օրենսգրքի 182 հոդվածի հատկանիշներով:
Վրեժ Զատիկյանի շահերի պաշտպան Արտակ Զեյնալյանը դատարանից պահանջեց, որ մերժեն ոստիկանության հայցը եւ ընդունեն իրենց հակընդդեմ պահանջը՝ ոստիկանների գործողությունները ոչ իրավաչափ ճանաչելու: Ըստ Արտակ Զեյնալյանի, ոստիկանությունը խախտել է իր վստահորդի մի շարք իրավունքները՝ կարծիքն ազատ արտահայտելու, խոսքի ազատության, միավորումներ կազմելու՝ խաղաղ հավաքների ազատության, ազատ տեղաշարժվելու, անձնական ազատության եւ անձեռնմխելիության:
Կարդացեք նաև
Այսօր իր եզրափակիչ ճառում Արտակ Զեյնալյանն ասաց, որ դեպքի օրը հավաքի մասնակիցների թիվը չի գերազանցել 100-ը: Տարածքում առկա ոստիկանների թիվը գերազանցել է հավաքի մասնակիցների թիվը: Ոստիկանները, որոնք բերման ենթարկելու պահանջ են ներկայացրել, չեն ներկայացել, չեն հայտնել իրենց պաշտոնը, չեն պարզաբանել Վրեժ Զատիկյանին նրա իրավունքներն ու պարտականությունները:
Ըստ ոստիկանության, ակտիվիստը փորձել է ճեղքել ոստիկանության շղթան, ներկայացել է իբր լրագրող, չի ենթարկվել ոստիկանների օրինական պահանջին:
Արտակ Զեյնալյանն էլ հարց բարձրացրեց. «Իսկ ինչո՞ւ պիտի լիներ շղթա, ինչո՞ւ էր փակվել այդ ճանապարհն ընդհանրապես, իսկ ինչո՞ւ պիտի շղթան չճեղքեր: Ինչո՞ւ պիտի քաղաքացին իրավունք չունենար երթով անցնել այդ հատվածով»:
Պարոն Զեյնալյանն ընդգծեց, որ Վրեժ Զատիկյանի վարչական տույժը 40-45 հազար դրամ է, հիմա դարձել է 55 հազար դրամ. «Ինչո՞ւ նախազգուշացում չի պահանջել ոստիկանությունը: Տվյալ դեպքում խաղաղ հավաքների ազատության իրավունքն է իրացվել: Պետությունը պարտավոր է պատասխանել՝ արդյոք այն պատասխանատվությունը, որին ենթարկվում է անձը, համաչա՞փ է»:
Ըստ Զատիկյանի պաշտպանի, ազատությունից զրկելու ռեժիմի մեջ բացակայում են վարչական կարգով ազատությունից զրկելու հիմքերը. «Մեր վստահորդին ազատությունից զրկելով՝ ոստիկանությունը ոչ թե հետապնդել է վարչական իրավախախտման վերաբերյալ արձանագրություն կազմելու նպատակ, այլ հենց նրան ազատությունից զրկելու նպատակ»:
Հաջորդ դատական նիստում դատարանը կհրապարակի որոշումը: Նիստը նշանակվեց օգոստոսի 3-ին՝ 11.00-ին:
Հռիփսիմե ՋԵԲԵՋՅԱՆ
