«Սահմանադրությունը չպետք է հաճախ փոփոխել այնքան, որ մենք իջեցնենք նրան ընթացիկ օրենսդրության մակարդակին»,- հուլիսի 20-ին «Մեդիա կենտրոնում» լրագրողների հետ հանդիպման ընթացքում ասաց «Թրանսփարենսի ինթերնեշնլ» հակակոռուպցիոն ընկերության իրավախորհրդատու Հերիքնազ Տիգրանյանը:
Նրա խոսքերով՝ երբեւէ չի հիմնավորվել, որ գործող Սահմանադրությունը առաջացրել է կամ կարող էր առաջացնել կառավարման ճգնաժամ, ինչով փորձ է արվում հիմնավորել սահմանադրական փոփոխությունների անհրաժեշտությունը. «Կառավարման ճգնաժամի մասին կարող էինք խոսել այն ժամանակ, եթե գործող Սահմանադրության իրավակարգավորումները չտային հնարավորություն լուծելու կառավարման մարմինների միմյանց հակակշռելու եւ միմյանց նկատմամբ փոխազդելու մեխանիզմները: Բայց այս Սահմանադրության գործողության ժամանակահատվածում երբեւէ կառավարման ճգնաժամ կամ նման վտանգ չի եղել»:
Իսկ «Քաղաքացիական հասարակության ինստիտուտ» հասարակական կազմակերպության նախագահ Արտակ Կիրակոսյանը նշեց, որ կողմ է սահմանադրական բարեփոխություններին, սակայն ներկայացված տարբերակը բարեփոխություն չէ. «Փաստորեն փորձ է արվում մի նոր հանրապետություն ստեղծել՝ 4-րդ հանրապետություն: Որեւէ հիմքեր դրան չկար, որ մի ճգնաժամ, որ դրա պատճառով մենք պետք է անցնենք նոր հանրապետության լրիվ նոր Սահմանադրությամբ: Ուրիշ հարց է, որ կան մի շարք խնդիրներ, որոնք լուծված չեն ե՛ւ առաջին Սահմանադրությամբ, ե՛ւ խմբագրված տարբերակով»:
Ամի ՉԻՉԱԿՅԱՆ
Կարդացեք նաև
Լուսանկարը՝ «Մեդիա կենտրոնի»
