Ըստ Սահմանադրության նոր նախագծի 47 հոդվածի՝ «Ազգային ժողովի պատգամավոր կարող է ընտրվել քսանհինգ տարին լրացած, վերջին հինգ տարում միայն Հայաստանի Հանրապետության քաղաքացի հանդիսացող, վերջին հինգ տարում Հանրապետությունում մշտապես բնակվող և պետական լեզվին տիրապետող յուրաքանչյուր ոք»:
Լրագրողները Սահմանադրական բարեփոխումների մասնագիտական հանձնաժողովի անդամ Վարդան Պողոսյանից հետաքրքրվել էին՝ այս դրույթը ենթադրո՞ւմ է, որ պատգամավորի թեկնածուն պետք է քննություն հանձնի: Վարդան Պողոսյանն արձագանքել էր՝ գուցե քննություն հանձնի, գուցե թեստ, ինչպես Ղազախստանում է:
Aravot.am-ը ԱԺ պատգամավոր Հրանտ Գրիգորյանից հետաքրքրվեց՝ պատրա՞ստ է նման փորձության: «Իհարկե պատրաստ եմ, դուք կասկածում ե՞ք»,-նեղսրտեց Գրիգորյանը:
Երբ ասացինք, որ ծանոթ չենք հայերենի իմացության իր մակարդակին, պատգամավորը կարճ կապեց. «Ցտեսություն, լավ եղեք»:
Գոհար ՀԱԿՈԲՅԱՆ
