«Փոփոխությունները ողջունելի են մեր երկրում»,- հուլիսի 20-ին «Հայելի» մամուլի ակումբում լրագրողների հետ հանդիպման ընթացքում ասաց բլոգեր Տիգրան Քոչարյանը: Սակայն անդրադառնալով սահմանադրական փոփոխությունների հրապարակված 7 գլուխներին՝ ասաց. «Այս տեքստով ներկայացված փաթեթին դեմ եմ»:
Բլոգերի համար ամենակարեւոր փոփոխությունը խորհրդարանական համակարգին անցնելն է: Ըստ նրա՝ հույս կա, որ եթե փոփոխված սահմանադրությունն ընդունվի, ապա այն 20-30 տարի չի փոխվելու եւ այդ ժամանակ բավականին լավ փոփոխություններ լինեն. «Նույնիսկ այն պահը, որ մեծամասնականը ընդհանրապես վերանում է, ոնց որ թե բդեշխության համակարգի մի մասը կոտրվում է: Այսինքն՝ դրա մեջ էլ դրական մի բան կա: Ես սահմանադրագետ չեմ, բայց որ ոչ պրոֆեսիոնալ հայացքով նայեցի, իմ կարծիքով՝ ոչ թե իրավաբանների խումբ է աշխատել, այլ ամեն մի իրավաբան հասցրել է ինչ-որ մի բան ավելացնել, որովհետեւ բավականին խայտաբղետ կետեր են եւ ընդհանուր տրամաբանությունից դուրս»:
Տիգրան Քոչարյանը նկատեց, որ սահմանադրական փոփոխություններով փորձ է արվում անցնել երկկուսակցական համակարգի, որը ըստ նրա՝ լավ տարբերակ է. «Այսքան շատ կուսակցություն մեր փոքր երկրում ընդհանրապես պետք չէ, իսկ երկկուսակցական համակարգը շատ երկրներում իրեն արդարացնում է, եւ դա վատ տարբերակ չի լինի: Եվ նաեւ նախագահի ընտրության համակարգը՝ ընտրիչների հետ կապված, նույնպես փորձ է արվում ինչ-որ ամերիկյան համակարգի անցնել, նախագահին կտրել ժողովրդից եւ դարձնել անգլիական թագուհի»:
Բլոգերը համարում է, որ սահմանադրական փոփոխությունների հարցը հասունացել էր եւ ընդդիմադիր կուսակցությունները ժամանակին առաջամարտիկներն էին եւ պահանջում էին, որ Հայաստանն անցնի խորհրդարանական բարեփոխումների, իսկ հիմա կերպարանափոխվել են եւ դեմ են դրան. «Եթե այս փաթեթը չանցնի, իշխանությունները շատ ձեւեր ունի վերարտադրվելու»:
Կարդացեք նաև
Ամի ՉԻՉԱԿՅԱՆ
