«Դա ինքնագլուխ որոշում չէր: Մենք քննարկել ենք մասնագետների հետ եւ մարզերում, եւ Երեւանում ու եկել ենք այդ եզրակացության: Մինչ օրս չկա տեխնիկական առաջադրանք, թե ի՞նչ աուդիտ պիտի անցկացվի: Եթե մենք համաձայնենք մասնակցել, վաղը մեզ կասեն` ֆինանսական աուդիտ ենք անում, մասնակցեք: Ի՞նչ է ինձ տալու ֆինանսական աուդիտը: Թե Բիբինն ինչպե՞ս ծախսեց ՀԷՑ-ի գումարները, ում որքա՞ն աշխատավարձ տվեց` ինձ համար մեկ է:
Եթե դու թույլ ես տվել, որ ինքը տվել է, դու էլ պիտի կառավարեիր: Ֆինանսական աուդիտին մեր մասնակցությունը միայն լեգիտիմություն է ապահովելու անօրինական մի գործողության, որն ամեն տարի անցկացվում է: Իսկ եթե տեխնիկական աուդիտ է, մասնագետների խումբը կմասնակցի»,- «Առավոտի» հետ զրույցում ասաց «Ոչ թալանին» նախաձեռնության անդամ Սոֆյա Հովսեփյանը` պատասխանելով հարցին՝ «Ոչ թալանին»-ը հրաժարվեց ՀԷՑ-ում աուդիտին մասնակցելուց. ավելի տրամաբանական չէ՞ր, որ մասնագիտական խումբ ձեւավորեիք, խումբը մասնակցեր աուդիտի ընթացքին, դուք էլ փողոցում, հրապարակներում, ինչպես ասում են, ձեռքը պահեիք զարկերակի վրա:
«Առավոտ» օրաթերթ
16.07.2015
