Փաստացի ԵՏՄ անդամ երկրների տնտեսություններն անկախ են, բայց ամուր կապված են իրար հետ: Այս մասին, ըստ «Tazabek»-ի, «Մակրոտնտեսական քաղաքականության եւ ինտեգրացիայի հարցերը Եվրասիական տնտեսական միությունում. ռիսկեր եւ կայուն զարգացում» անվանմամբ կլոր սեղանի ընթացքում ասել է Եվրասիական տնտեսական հանձնաժողովի մակրոտնտեսական քաղաքականության տնօրենի տեղակալ Անդրեյ Լիպինը:
Նրա խոսքերով՝ ռուբլու արժեզրկումը խիստ արտացոլվում է փոխադարձ առեւտրի վրա. «Մեզ մոտ բոլոր երկրները կենտրոնական բանկ ունեն եւ բոլորն ունեն սեփական դրամավարկային եւ արտարժույթային քաղաքականությունը: Մեզ մոտ մի տնտեսության ցնցումները շատ լավ են փոխանցվում մյուսներին, դա նաեւ վերաբերում է արտարժույթին»:
Լիպինը նշել է, որ եթե Հայաստանում եռակի արժեզրկում տեղի ունենա, Ռուսաստանի վրա չի ազդի: Նույնը վերաբերում է նաեւ Ղրղըզստանին: Իսկ եթե Ռուսաստանում 50% արժեզրկում լինի, կանդրադառնա բոլորի վրա: «Տնտեսություններն այնպես են աշխատում, որ կարիք է լինում համաձայնեցված քաղաքականություն վարել: Եթե ցնցումներից հետո արժեզրկում է լինում, ապա անդամ երկրների ներքին շուկաները սկսում են խափանումներով աշխատել»:
Պատրաստեց Աշոտ ԻՍՐԱԵԼՅԱՆԸ
