«Մենք այսօր էլ պատրաստ ենք վճարել նաիրիտցիների պարտքերը»,- քիչ առաջ կառավարության նիստին ասաց էներգետիկայի եւ բնական պաշարների նախարար Երվանդ Զախարյանը՝ վարչապետ Հովիկ Աբրահամյանի հորդորով անդրադառնալով նաիրիտցիների աշխատավարձերի խնդրին:
Ե. Զախարյանի ներկայացմամբ՝ նաիրիտցիների աշխատավարձի պարտքը կազմում է 5 մլրդ 310 մլն դրամ: Նախարարի փոխանցմամբ՝ աշխատավարձերի հաշվարկման ընթացքում որոշակի սխալներ են եղել, որոնք շտկվում են:
«Նաիրիտցիները ուզում են, որ իրենց աշխատավարձերը միանգամից ստանան: Մենք առաջարկել ենք վճարել աստիճանաբար, նրանց, ում դիմումները պատրաստ են՝ աշխատավարձը վճարենք: Սակայն աշխատակիցները ցանկանում են միանգամից ամբողջովին ստանալ աշխատավարձերը: Այդ դեպքում մենք կարող ենք վճարել ամսվա վերջին»,- ասաց Երվանդ Զախարյանը:
Նիստի ժամանակ Ազգային անվտանգության ծառայության պետ Գորիկ Հակոբյանն ասաց. «Նաիրիտցիները վստահություն չունեն, չկա վստահություն իշխանությունների նկատմամբ: Մարդիկ ասում են՝ կգան կհասնեն 25-ին, հետո կասեն էլ փող չկա: Մարդիկ երաշխիքներ են ուզում, որ իրենց աշխատավարձերը ստանան»:
Կարդացեք նաև
Պրն Զախարյանը նորից կրկնեց, որ իրենք աշխատավարձերը կարող են ամբողջությամբ վճարել միայն ամսվա վերջում, իսկ եթե չեն սպասի, ապա կտրվի մաս-մաս:
Նելլի ԲԱԲԱՅԱՆ
