Երեկ Ծաղկաձորում լրագրողների հետ ՀԱՕԿ-ի գլխավոր քարտուղար Հրաչյա Ռոստոմյանի եւ ազատ ըմբշամարտի ազգային հավաքականի գլխավոր մարզիչ Արայիկ Բաղդադյանի հանդիպման ժամանակ շոշափվեցին նաեւ Բաքվի Եվրոպական խաղերի հետ կապված հարցեր:
Aravot.am-ը հետաքրքրվեց, թե Բաքվի մրցասպարեզներում տիրող մթնոլորտում պայքարելը մեր մարզիկներին հոգեպես ավելի կոփե՞ց, որին Հրաչյա Ռոստոմյանը պատասխանեց. «Ես իմ պահով փորձեմ պարզ ու կոնկրետ պատասխանել՝ մինչեւ Բաքու եւ Բաքվից հետո: Հիմա ես չեմ պատկերացնում, որ կարող եմ մի տեղ հայտնվել եւ լինել վախեցած կամ կաշկանդված: Մանուկ հասակից, ես ամենից շատ վախեցել եմ շնից: Բայց Բաքվից հետո սկսել եմ շներին սիրել: Իմ մեջ ընդհանրապես վախի զգացողությունը, հոգեբանական այդ արգելքն անցել է: Վստահ եմ՝ նաեւ մյուսների մեջ: Իսկ մարզիկների համար, կարծում եմ, հոգեբանական այս զգացողությունը պետք է ավելի ուժեղ լինի: Երբ դժոխքի միջով անցնում ես, մնացածն արդեն սարսափելի չէ: Կարծում եմ, այս հարցում մեր մարզիկներն ինձնից ավելի ուժեղ կլինեն»:
Աշոտ ՀԱԿՈԲՅԱՆ
