Մարտունիի մշակույթի տանը շարունակվում է շախմատի «Սեւանա լիճ 2015» միջազգային մրցաշարը, որին մասնակցում են Հայաստանի, Ռուսաստանի, ԱՄՆ-ի, Հնդկաստանի, ՄԱԷ-ի, Իսպանիայի, Լեհաստանի տասը երիտասարդ գրոսմայստերներ:
Երեկ կայացավ երրորդ տուրը, որում Սամվել Տեր-Սահակյանը հաղթեց Քշիշտոֆ Դուդային, Սամուել Սեւյանը (նկարում)՝ Ռոբերտ Հովհաննիսյանին, Սալեմ Սալեհը՝ Տիգրան Լ. Պետրոսյանին, Վիդիթ Գուջրաթին՝ Հովհաննես Գաբուզյանին: Վլադիսլավ Արտեմյեվ-Դավիդ Գուիջարո պարտիան 126-րդ քայլում ավարտվեց մարտական ոչ-ոքի արդյունքով:
Չորրորդ տուրից առաջ մրցաշարային աղյուսակը 2,5-ական միավորով գլխավորում են իսպանացի Դավիդ Անտոն Գուիջարոն եւ Վիդիթ Սանտոշը (Հնդկաստան): Նրանցից կես միավոր պակաս են վաստակել հայաստանցի գրոսմայստեր Սամվել Տեր-Սահակյանը եւ Քշիշտոֆ Դուդան (Լեհաստան): Այնուհետեւ գալիս են ռուսաստանցի Վլադիսլավ Արտեմյեւը եւ ՄԱԷ-ից Սալեմ Սալեհը՝ 1,5-ական միավոր, Տիգրան Լ. Պետրոսյանը եւ Սամուել Սեւյանը (ԱՄՆ)` 1,0-ական. ընդորում, մեկնարկային երկու տուրերում պարտություն կրած ամերիկացի մեր հայրենակիցը երեկ առավելության հասավ Ռոբերտ Հովհաննիսյանի նկատմամբ: Հովհաննես Գաբուզյանը եւ Ռոբերտ Հովհաննիսյանը կեսական միավորով եզրափակում են մրցաշարային աղյուսակը:
ԱՇՈՏ ՀԱԿՈԲՅԱՆ
Կարդացեք նաև
«Առավոտ» օրաթերթ
15.07.2015
