Հուլիսի 17-ից 19-ը Երեւանի «Միկա» մարզապալատում անցկացվելու է ազատ ոճի ըմբիշ, օլիմպիական խաղերի արծաթե մեդալակիր, աշխարհի եռակի գավաթակիր, Եվրոպայի չեմպիոն, Հայաստանի ըմբշամարտի ֆեդերացիայի պատվավոր նախագահ Ստեփան Սարգսյանի մրցանակների հոբելյանական 20-րդ խաղարկությունը:
Մրցաշարն այս անգամ առավել շատ մասնակից երկրներ ու աշխարհահռչակ ըմբիշներ է բերելու Երեւան: Պատշաճ մասնակցելու նպատակով Հայաստանի ազատ ոճի ըմբշամարտի ազգային հավաքականն ընդլայնված կազմով ուսումնամարզական հավաք է անցկացնում Ծաղկաձորում:
Այսօր ՀԱՕԿ-ն ու ՀԸՖ-ն լրագրողներին հրավիրել էին Ծաղկաձոր՝ տեղում ծանոթանալու մարզումների ընթացքին, զրուցելու հավաքականի մարզիչների եւ ըմբիշների հետ:
Հավաքականի գլխավոր մարզիչ Արայիկ Բաղդադյանը նշեց, որ այս տարի մրցաշարն անչափ ուժեղ կազմ է հավաքել: «Մենք այս տարի հանդես ենք եկել բազմաթիվ հեղինակավոր մրցաշարերում, բայց հիմա, երբ համեմատում եմ, Ստեփան Սարգսյանի մրցաշարն իր մարզական մակարդակով, եթե զիջի, ապա միայն Բելառուսում անցկացված Ալեքսանդր Մեդվեդի մրցաշարին: Գալիս են 15 երկրների հավաքականներ իրենց ուժեղագույն կազմերով՝ օլիմպիական խաղերի, աշխարհի, Եվրոպայի, Ասիայի չեմպիոններ ու մեդալակիրներ:
Կարդացեք նաև
Հայաստանն էլ ներկայացնելու են անխտիր բոլոր ուժեղագույնները եւ երկրորդ-երրորդ համարները, քանի որ այս մրցաշարը նաեւ աշխարհի առաջնության նախապատրաստության կարեւորագույն փուլ է եւ մենք քաշային կարգեր ունենք, որտեղ դեռ վերջնականապես չենք կողմնորոշվել, թե ում է ավելի նպատակահարմար վստահել աշխարհի առաջնությունում Հայաստանը ներկայացնելու պատիվը», – ասաց գլխավոր մարզիչը՝ չմոռանալով երախտագիտություն հայտնել ՀԱՕԿ-ի նախագահ Գագիկ Ծառուկյանին, որն իր անձնական միջոցներով, սահմանել աննախադեպ մրցանակային գումարներ: Պարոն Ծառուկյանը Ստեփան Սարգսյանի քաշային կարգում հաղթողին կնվիրի նաեւ ավտոմեքենա: Արայիկ Բաղդադյանի խոսքերով, ՀԸՖ նախագահ Սամվել Կարապետյանն էլ իր վրա է վերցրել կազմակերպական բոլոր ծախսերը, որոնք իրականացվում են ամենաբարձր մակարդակով:
Աշոտ ՀԱԿՈԲՅԱՆ
