Aravot.am-ը Շիրակի մարզպետարանի լրատվության եւ հասարակայնության հետ կապերի վարչության պետ Սամվել Գրիգորյանից հետաքրքրվեց, թե շիրակցիները ի՞նչ բողոքներով են ահազանգում մարզպետարան:
«Ամառվա ամենաշատ բողոքները կապված են ջրամատակարարման հետ, մարզպետարանի «թեժ գծին» ահազանգած քաղաքացիների բողոքների գերակշիռ մասը ջրմուղից է: Մեկը դժգոհում է պոմպից, մյուսը՝ ջրամատակարարման անհասկանալի գրաֆիկից: Օրինակ՝ Գյումրու կենտրոնական թաղերից մեզ ահազանգած բնակիչները խնդրում են ջրմուղից պարզաբանել, թե ինչո՞ւ ամառվա այս շոգ օրերին իրենք ջուր չունեն, իսկ իրենցից 50 մետր հեռավորության վրա նախկին քաղսովետի շենքի բակում գտնվող ավտոլվացման կետում ջուրը շուրջօրյա է, հոսում է:
Մեզ ահազանգած բնակիչներից մեկն ասում էր՝ էդ ինչպե՞ս է, որ ժամանցային գոտիներում՝ սրճարաններում ջուրը երբեք չի կտրվում, ժամ, պատարագ հասկացություն նրանց համար գոյություն չունի, իսկ մենք, բնակվելով նրանց կողքին, մի կաթիլ ջուր չունենք: Նույն ջրագծով չի գալի՞ս ջուրը…
Բողոքներ կան Տիգրան Մեծ, Մանուշյան փողոցներից, Գյումրիի կենտրոնական հատվածներից… Հիշո՞ւմ եք մի քանի տարի առաջ նման մասսայական բողոքներ կային էլցանցից, հիմա բողոքները ջրմուղից են:
Կարդացեք նաև
Մենք, բնականաբար, բնակիչների բողոքները փոխանցում ենք ջրմուղի ղեկավարությանը, այստեղից տարբեր պարզաբանումներ են տալիս: Ասում են, որ տեղյակ են, ֆիքսել են այդ ահազանգը, երբեմն ջրամատակարարման դադարեցումը կապում են Գյումրիում ջրագծերը փոխելու աշխատանքների հետ, գիտեք, որ Գյումրիում ջրագծերը փոխում են…Մի խոսքով ՝մեկնաբանությունները տարբեր են», -ասաց Սամվել Գրիգորյանը:
Նունե ԱՐԵՎՇԱՏՅԱՆ
