Տավուշի մարզի Այրում քաղաքի բնակիչ, 1993թ. ծնված Արմեն Բազազյանին մեղադրանք է առաջադրվել այն բանի համար, որ նա հանդիսանալով 21 տարին լրացած անձ, 2014թ. դեկտեմբերի 19-ից փաստացի ամուսնական հարաբերություններ է հաստատել 1999թ. մարտին ծնված, Ալավերդի քաղաքի բնակչուհու հետ եւ 2014թ. դեկտեմբերի 20-ից մինչեւ 2015թ. մարտի 6-ը սեռական հարաբերություններ է ունեցել նրա հետ:
Նոյեմբերյանի սահմանապահ զորամասի զինծառայող Ա. Բազազյանին մեղադրանք է առաջադրվել ՀՀ քրեական օրենսգրքի 141 հոդվածի 2-րդ մասի 1-ին եւ 3-րդ կետերով: Մինչ դատաքննությունը սկսվելը, Ա. Բազազյանը միջնորդել է անցկացնել արագացված դատաքննություն, դատարանը միջնորդությունը բավարարել է:
Հուլիսի 9-ին Բերդ քաղաքում Տավուշի մարզի առաջին ատյանի դատարանի դատավոր Զոյա Զաքինյանը վճռել է Ա. Բազազյանին մեղավոր ճանաչել նրան առաջադրված հոդվածով եւ նրան դատապարտել ազատազրկման 4 տարի ժամկետով, կիրառել ՀՀ քրեական օրենսգրքի 70 հոդվածը եւ նշանակված պատիժը պայմանականորեն չկիրառել՝ փորձաշրջան նշանակելով 1 տարի ժամկետով: Ըստ «Դատալեքս» դատական տեղեկատվական համակարգի՝ Բազազյանի վարքագծի նկատմամբ վերահսկողությունը հանձնարարվել է զորամասի հրամանատարությանը:
Ոսկան ՍԱՐԳՍՅԱՆ
