Մարտունիում մեկնարկեել է ՖԻԴԵ-ի դասակարգման 15-րդ կարգի արժանացած շախմատի «Սեւանա լիճ 2015» միջազգային մրցաշարը, որին մասնակցող 10 երիտասարդ գրոսմայստերներն արդեն հասցրել են ծանրակշիռ խոսք ասել շախմատի աշխարհում:
Մարտունիի մշակույթի պալատում հանդես են գալիս հայաստանցիներ Տիգրան Լ. Պետրոսյանը, Սամվել Տեր-Սահակյանը, Հովհաննես Գաբուզյանը, Ռոբերտ Հովհաննիսյանը, Ամերիկացի շախմատային հրաշամանուկ, մեր հայրենակից Սամուել Սեւյանը, ռուսաստանցի Վլադիսլավ Արտեմյեւը, հնդիկ Վիդիթ Սանտոշ Գուջրաթին, լեհ Յան Քշիշտոֆ Դուդան, իսպանացի Դավիդ Անտոն Գուիջարոն, ՄԱԷ-ից Սալեմ Սալեհը:
Երեկ կայացավ երկրորդ տուրը: Կենտրոնականը Տիգրան Լ. Պետրոսյանի եւ Սամուել Սեւյանի դիմակայությունն էր, որում ավելի ուժեղ էր հայաստանցին: Ի դեպ, սա Սեւյանի երկրորդ անընդմեջ պարտությունն էր Մարտունիում, ինչպես նաեւ Ռոբերտ Հովհաննիսյանինը, որն իր հերթին զիջեց Քշիշտոֆ Դուդային:Մյուս պարտիաներն ավարտվեցին այսպիսի հաշիվներով. Վիդիթ Գուջրաթի-Վլադիսլավ Արտեմյեւ՝ 1:0, Դավիդ Գուիջարո-Սալեմ Սալեհ՝ 1:0, Սամվել Տեր-Սահակյան-Հովհաննես Գաբուզյան՝ 1:0:
Հիմնական իրադարձությունները դեռ առջեւում են, սակայն հետաքրքիր է, որ Սամուել Սեւյանը, որ արդեն հասցրել է բազմաթիվ «նեղություններ» պատճառել աշխարհի ուժեղագույն գրոսմայստերներին, զրո միավորով եզրափակում է մրցաշարային աղյուսակը: Իսկ այն գլխավորում են երկուական հաղթանակ տարած Դավիդ Անտոնն ու Քշիշտոֆ Դուդան:
ԱՇՈՏ ՀԱԿՈԲՅԱՆ
«Առավոտ» օրաթերթ
14.07.2015
