Չարբախի ոստիկանապետի նախկին տեղակալ Վարդան Ղուկասյանի (Դոգ) փաստաբան Գեորգի Մելիքյանը իր պաշտպանյալին 4,5 տարվա ազատազրկման պատիժը չափից ավելի շատ է համարում:
Հիշեցնենք, որ ըստ մեղադրանքի, ոստիկանության մայոր Վարդան Ղուկասյանը 2013թ. օգոստոսին հյուրանոցային մի համալիրի վարձակալից գումար շորթելու դիտավորությամբ իր մտերիմ Հովհաննես Եսայանին հանձնարարել է տեսանյութեր նկարահանել այդ համալիրի մոտ պարբերաբար մարմնավաճառությամբ զբաղվող կանանց վերաբերյալ:
Ըստ փաստաբանի, Վարդան Ղուկասյանի նկատմամբ ամենամեղմ պատիժը պետք է կիրառվի: «Որովհետեւ իրենք էլ են լավ հասկանում, որ դա առաջին հերթին իրենց է պետք, հետո Վարդան Ղուկասյանին»,-հավելեց փաստաբանը՝ առանց մանրամասնելու՝ ինչու:
Հիշեցնենք, որ տարիներ առաջ Վարդան Ղուկասյանը նախագահական նստավայրի դիմաց բողոքի ակցիայի ժամանակ սպառնում էր՝ խոստանալով, իր խոսքով, պատռել ոստիկանական համակարգի դիմակը: Ըստ նրա՝ այդ ժամանակ իրեն սպառնում էր Երևանի ոստիկանապետ Աշոտ Կարապետյանը:
Փաստաբանի խոսքով, իր պաշտպանյալի գործով դատաքննությունն արագացված կարգով է, այդ պատճառով բոլոր ապացույցները չեն հետազոտվել գործի շրջանակում:
Կարդացեք նաև
Մեր հարցին, թե Վարդան Ղուկասյանն ընդունե՞լ է իր մեղքը, փաստաբանն ասաց՝ այնքանով, որ ինքն է այդ երկու այսպես ասած գաղտնի ոստիկանության աշխատակիցներին հավաքագրել եւ ինքն է մեղավոր, որ այդ երկու աշխատակիցները հանցագործություն են կատարել:
«Վարդան Ղուկասյանի՝ համակարգում գտնվելը որոշակի անձանց ձեռք չէր տալիս»,- հավելեց փաստաբանը՝ կրկին չմանրամասնելով՝ ում ձեռնտու չէր Ղուկասյանի՝ համակարգում գտնվելը:
Արփինե ՍԻՄՈՆՅԱՆ
