«Բժշկական նպատակներով թմրամիջոցների կիրառման կարգը» փաստաթուղթը, որը պատրաստ է որպես նախագիծ, կլինի ամենամեծ քայլը պալիատիվ օգնության հաստատման գործում: Այս մասին հուլիսի 14-ին «Հյումն Րայթս Վոտչ» կազմակերպությունը «Ինձ մնում է միայն արտասվել» քաղցկեղը եւ պալիատիվ խնամքի համար իրականացվող պայքարը Հայաստանում զեկույցի ներկայացման ընթացքում ասաց Իրավունքների զարգացման կենտրոնի տնօրեն Վիոլետա Զոփունյանը:
Նրա խոսքերով՝ այդ փաստաթուղթը սահմանում է ավելի հեշտացված ընթացակարգ, որը իր մեջ չի ներառում բարդ հանձնաժողովային համակարգ, մի քանի ստորագրության առկայության դեպքում թմրամիջոցի տրամադրում: Ըստ նրա օրենսդրական կարգավորումները կարեւոր կլինեն ուռուցքաբանների կամ բժիշկների համար, որոնք իրենց գործողությունների համար կունենան իրավական հիմքեր. «Այն ընդունելու դեպքում մենք հնարավորինս կկարողանանք հեշտացնել հիվանդների եւ նրանց ընտանիքների կյանքը եւ թույլ կտանք նրանց արժանապատիվ մահանալ եւ հեռանալ այս կյանքից»:
Վիոլետա Զոփունյանը, անդրադառնալով կրթական ոլորտին, ասաց, որ դեռեւս բժշկական կրթական հաստատություններում չկա պալիատիվ օգնության հիմնական դասընթաց: Փոխարենը՝ մասնագետները մի շարք դասընթացներ են կազմակերպել. «Գրեթե բոլոր ուռուցքաբանները ստացել են պալիատիվ օգնության մասին տեղեկություններ: Սակայն, դասընթացները չեն եղել պարբերաբար եւ պարտադիր բնույթ չեն կրում, եւ մենք խնդիր ունենք պալիատիվ օգնությունը համապատասխան բժշկական կրթության մեջ ընդգրկել, որպեսզի հետագայում մասնագետները կարողանան աշխատել»:
Ամի ՉԻՉԱԿՅԱՆ
