ԱԺ արտաքին հարաբերությունների հանձնաժողովի ընդդիմադիր անդամ Թեւան Պողոսյանի համար անհասկանալի է, թե ինչո՞ւ Հելսինկիում ԵԱՀԿ վեհաժողովի հռչակագրի քվեարկության ժամանակ հայաստանյան պատվիրակության անդամները միասնաբար չեն մասնակցել քվեարկությանը: «Եթե Գեղամյանի քվեարկության հիմքում ազգերի ինքնորոշման սկզբունքի գերակայության տրամաբանությունն է գործել, ապա ինչո՞ւ մյուս պատվիրակները համամիտ չէին նրա հետ»,- ասաց Թեւան Պողոսյանը` հավելելով, որ այս պարագայում առաջ է գալիս այն մտայնությունը, որ խնդիրը ոչ թե տարածքային ամբողջականության կետին է վերաբերում, այլ ՌԴ-ի նկատմամբ քննադատությանը:
«Առավոտը» փորձեց նաեւ ԱԺ արտաքին հարաբերությունների հանձնաժողովի նախագահ Արտակ Զաքարյանից պարզել` նախապես տեղյա՞կ է եղել հանձնաժողովի ղեկավարի քվեարկության մասին, քանզի հայտնի է, որ իր ղեկավարած հանձնաժողովն այս կամ այն կերպ կոորդինացնում է միջազգային կառույցներում հայաստանյան պատվիրակությունների քվեարկությունները: Պարոն Զաքարյանի հետ առայժմ չհաջողվեց կապվել:
«Առավոտ» օրաթերթ
11.07.2015
