«Ոչ թալանին» նախաձեռնությունը հուլիսի 11-ին Վանաձորում հանրային քննարկում էր կազմակերպել: Հանրային քննարկում պետք է տեղի ունենար Հայք հրապարակում, բայց ինչպես արդեն տեղեկացրել էինք, այնտեղ համերգ էր նախապատրաստվում, եւ հանրային քննարկումը տեղի ունեցավ Արցախի պուրակում:
Վանաձորում կազմակերպած ցույցերի աշխատանքային խմբի անդամ Մարտին Ադամյանը Aravot.am-ի հետ զրույցում ասաց, որ մինչեւ «Ոչ թալանին» նախաձեռնության հայտարարության տարածումը, թե Վանաձորում հանրային քննարկում են կազմակերպելու, արդեն որոշված էր, որ հուլիսի 11-ին այդ հրապարակում համերգ է լինելու. «Երբ որ արդեն տեղեկություն եղավ, տղաները երեւի թե չգիտեին, թե համերգ պետք է տեղի ունենա: Այդպես իրենց տեղյակ պահեցին, որ համերգ է տեղի ունենալու եւ մեկը մյուսին կխանգարի»:
Անդրադառնալով Վանաձոր քաղաքում տեղի ունեցած բողոքի ակցիաներին՝ Մարտին Ադամյանն ասաց, որ Վանաձորում առաջին անգամ է, որ բնակչությունը մեկ հարցի շուրջ համախմբվում է եւ պայքարի է դուրս գալիս. «Վանաձորում նման բան դեռ չէր եղել: Շատ գովելի է, որովհետեւ միշտ ինչ-որ ցույց, ինչ-որ պահանջ լինելու դեպքում ես անձամբ այցելել եմ Երեւան եւ աջակցել եմ իմ ընկերներին եւ իմ պահանջը ներկայացրել: Այս անգամ շատ հաճելի էր, որ այստեղ տեղի ունեցավ, եւ ոգեւորեց այն փաստը, որ իմ մտածած մարդկանց քանակը գերազանցվեց»:
Նա հավելեց, որ շատ է կարեւորում այսօր տեղի ունեցած հանրային քննարկումը, եւ որ իրենք «Ոչ թալանին» նախաձեռնությանը ավելի շուտ էին սպասում. «Երբ որ ժողովուրդը հավաքված էր եւ նրանք գային ավելի ոգեւորվածություն կլիներ: Համենայն դեպս իրանք են այս ամենի հիմքում, այն մարդկանցից, որոնք չամաչեցին դուրս եկան եւ ասացին՝ վերջ, հերիք է մեզ թալանեք»:
Կարդացեք նաև
Ամի ՉԻՉԱԿՅԱՆ
