Այսօր ՀՀ ԶՈՒ գլխավոր շտաբի պետի տեղակալ, գեներալ-լեյտենանտ Մովսես Հակոբյանն այցելեց Հանրապետական կենտրոնական հավաքակայան եւ հանդիպեց ամառային զորակոչի մասնակիցներին:
Գեներալ-լեյտենանտը երիտասարդներին բացատրեց, որ զորակոչային տարիքի ցանկացած երիտասարդի համար բանակում ծառայելը կարեւոր է: «Ես տեսնում եմ, որ դուք հասկանում եք, թե ուր եք գնում: Դուք Եռաբլուրում անշուշտ եղել եք: Ի՞նչ եք զգացել: Օրինակ, ես ամեն անգամ զգացել եմ, որ մեկին պիտի ապտակեմ: Կարծում եմ, հասկանում եք թե ում մասին է ասածս: Այս երկու տարվա ընթացքում ապտակելու, ձեր պապերի հանդեպ արվածի դիմաց վրեժխնդիր լինելու հնարավորություն ձեզ տրվելու է», – ասաց գլխավոր շտաբի պետի տեղակալը:
Խոսելով ընդհանրապես ծառայության եւ բանակում ներքին կարգուկանոնի մասին, Մովսես Հակոբյանը զորակոչիկներին ասաց. «Դուք պետք է ուժեղ լինեք, որովհետեւ բանակին ուժեղ զինվոր է պետք: Բայց չի նշանակում, թե ուժեղ զինվորն իրավունք ունի թույլին ճնշել, նվաստացնել: Ուժեղ է այն մարդը, որը կարողանում է իրեն ուժեղ պահել ու նաեւ օգնել ընկերներին»:
Խոսելով բանակում արատավոր երեւույթների մասին՝ գեներալ-լեյտենանտն ավելացրեց. «Վստահաբար իմացեք, հասարակությունում ինչքան արատավոր, բացասական երեւույթ կա, բանակում մի քանի հարյուր անգամ պակաս է: Եվ հիմնական պատճառն ու մեղավորը միշտ լինելու եք դուք: Եթե դուք արատավոր բաներ թույլ չտաք, սխալ չգործեք, ոչ ոք ձեր հանդեպ չի կարողանա սխալ գործել: Այս առումով Զինված Ուժերը պաշտպանված են: Ձեզ մաղթում եմ, որպեսզի լինեք մարտունակ եւ ուժեղ: Մնացածը բանակը կսովորեցնի»:
Կարդացեք նաև
Աշոտ ՀԱԿՈԲՅԱՆ
