2014 թվականին «Հայաստանի էլեկտրական ցանցեր» ընկերության վնասները սակագնի կարգավորման թերացումների պատճառով աճել են 8%-ով եւ կազմել 10.7 միլիարդ դրամ: Այս մասին, ըստ «TASS»-ի, հայտարարել է «Ինտեր ՌԱՕ»-ի ղեկավար խորհրդի անդամ, ռազմավարության եւ ներդրումային բլոկի ղեկավար Իլնար Միրսիյապովը:
«Գործող սակագնային կարգավորումը չի երաշխավորում ՀԷՑ-ի եկամուտները եւ հանգեցնում է քրոնիկ վնասների»,- ասել է նա եւ հավելել, որ կազմակերպության սակագնային շահույթը վերջին հնգամյակում նվազել է ավելի քան 2 անգամ՝ 50%-ից հասնելով 23%-ի:
Իլնար Միրսիյապովի խոսքերով՝ սա նշանակում է, որ սպառողական սակագների բարձրացումից ստացվող լրացուցիչ եկամուտները ստացել են գեներացնող ընկերությունները, այլ ոչ թե ՀԷՑ-ը: «Եվ սակագնի աճի 73%-ը բաժին է հասնում հանրապետության այլ էլեկտրաէներգետիկ ձեռնարկություններին»:
ՀԷՑ-ը, ըստ «Ինտեր ՌԱՕ»-ի պաշտոնյայի, ստանձնում է գլխավոր ռիսկերը եւ իր վրա է արտահայտվում էլեկտրաէներգիայի ոլորտի հաշվեկշռի խախտումը, որի պատճառով ընկերությունը 2012 թվականից ի վեր անընդհատ վնասներ է կրում: Այդ պատճառով ՀԷՑ-ը ստիպված է վարկ վերցնել, ինչն ավելի է բարդացնում կազմակերպության վիճակը: «2015 թվականի բացասական միտումը շարունակվում է»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
