Արդեն տեղեկացրել ենք, որ այսօր Հանրային ծառայությունները կարգավորող հանձնաժողովը 60 միլիոն դրամի չափով տուգանեց «Հայաստանի էլեկտրական ցանցեր» ընկերությանը՝ մի շարք խախտումների համար: Որոշ խախտումներ վերաբերում էին բաժանորդ-ՀԷՑ պայմանագրի խախտմանը. էլեկտրական ցանցերին միացման սահմանված ժամկետը լրացել էր, սակայն, ՀԷՑ-ը այդպես էլ էլեկտրաէներգիայով չի ապահովել բաժանորդներին:
Խախտումներից մեկն էլ հետեւյալն է՝ ՀԷՑ-ի գլխավոր տնօրենի 2015 թվականի մարտի 31-ի 84Л հրամանով հաստատվել է նոր սպառողների սպառման համակարգն էլեկտրական ցանցին միացման նոր կարգ, որով սահմանվել է, որ ընկերությունը գտնվում է ծանր ֆինանսատնտեսական վիճակում եւ դիմողի սպառման համակարգն էլեկտրական ցանցին հնարավոր է միացնել միայն այն դեպքում, եթե դիմումատուն սահմանված միացման վճարից բացի՝ վճարի նաեւ սպառման համակարգն էլեկտրական ցանցին միացնելու նպատակով կատարման ենթակա փաստացի ծախսումների գումարը՝ նշված գումարը հետագա 5 տարիների ընթացքում սպառված էլեկտրաէներգիայի դիմաց վճարների հաշվին մարելու պայմանով: Սա, հանձնաժողովի սահմանած կարգի խախտում է:
Կարդացեք նաև
Այսօր ՀԾԿՀ նիստում ՀԷՑ-ի գլխավոր տնօրենը ներկայացրեց, թե ինչո՞ւ է նման հրաման տվել, այն, ըստ Բիբինի, ժամանակավոր էր, եւ նման քայլի է գնացել ընկերության ֆինանսական ծանր պայմաններից ելնելով:
Բիբինի արդարացումները դիտեք՝ տեսանյութում
Հանձնաժողովի անդամ Սամվել Արաբաջյանն էլ նկատեց, որ լիցենզիայի պայմաններից մեկն էլ այն է, որ ՀԷՑ-ը պիտի առաջնորդվի ՀՀ օրենքներով. «Ի՞նչ է նշանակում, որ մի տեղ որոշեց, որ ընկերության ֆինանսական վիճակը լավ չի, մեզի մի քիչ փող ա պետք, ու վաղվանից որոշում ենք, որ ով ուզում է էլեկտրաէներգիային միանա, պիտի 100% վճարում կատարի՝ սրանից հետո»:
Մանրամասն՝ տեսանյութում
Հանձնաժողովի նախագահ Ռոբերտ Նազարյանն էլ անկեղծացավ, պատմեց իր եւ Բիբինի հեռախոսազրույցի մանրամասները վերը նշված խնդրի մասին. «Ես կապվեցի պարոն Բիբինի հետ, ասեցի՝ ինչ պատմություն է սա, ասաց՝ այո, մեր ֆինանսական վիճակը վատ է: Հետո իմացա, որ նաեւ հրաման կա, ինքը ղեկավարվում է իր արձակած հրամանով»:
Մանրամասն՝ տեսանյութում
Ապա Բիբինն ասաց, որ իր իսկ տված հրամանն արդեն վերացված է, այնուամենայնիվ, հանձնաժողովը ընդհանուր առմամբ 70 միլիոնի տուգանք կիրառեց:
Նիստը դեռ չավարտված՝ Բիբինը լքեց դահլիճը, նա հրաժարվեց պատասխանել լրագրողների հարցերին, եւ հորդորեց հարցերն ուղղել իր մամուլի քարտուղարին՝ Նատալյա Սարջանյանին:
Հարցին՝ որեւէ բանակցություն ընթանո՞ւմ է ՀԷՑ-ի վաճառքի հետ կապված, Սարջանյանն ասաց՝ ոչ: ՀԷՑ-ում աուդիտ անցկացնելու վերաբերյալ հարցին Սարջանյանը պատասխանեց, որ ըստ նախնական տվյալների, 3-6 ամիս կտրվի, եւ պատրաստվում է տեխնիկական առաջադրանքը:
Aravot.am-ի այն հարցին էլ՝ ՀԷՑ-ի լուծարման խնդիր կա՞, քանի որ սեփական կապիտալն ակտիվներից բավականին նվազ է, մամուլի քարտուղարն ասաց՝ ոչ: Բիբինին մեկ այլ անձով փոխարինելու մասին հարցին էլ, մամուլի քարտուղարը վստահեցրեց, որ նման բան չկա: ՀԷՑ-ի հնարավոր վաճառքի առնչությամբ էլ Սարջանյանն ասաց. «Կովալչուկը ոչ թե չբացառեց վաճառքը, այլ ընդամենը նշեց, որ ԻՆՏԵՌ ՌԱՕ-ն պատրաստ է գնել եւ վաճառել ցանկացած ակտիվ իրեն համապատասխան գին առաջարկելու դեպքում: Ես Կովալչուկի փոխարեն գին ասել չեմ կարող: Բայց այս պահին ՀԷՑ-ի վաճառքի մասին որեւէ բան ասել չեմ կարող»:
Նշենք, որ Բորիս Կովալչուկը ԻՆՏԵՌ ՌԱՕ կառավարման խորհրդի նախագահն է:
Մանրամասն՝ տեսանյութում
Նելլի ԲԱԲԱՅԱՆ
