Սպառողների ազգային ասոցիացիայի փոխնախագահ, մարկետինգի, մոնիտորինգի բաժնի պետ Ռուբեն Հայթյանը հուլիսի 8-ին «Հայելի» մամուլի ակումբում լրագրողների հետ հանդիպման ընթացքում անդրադարձավ Երեւանում անցկացված բժիշկների միջազգային համաժողովում ֆոլաթթվով ալյուրի հարստացման քննարկմանը, որի ընթացքում պարզվել է, որ քննարկում չի լինելու, այլ իրենք պարզապես պետք է լսեն ելույթները: Նա նշեց, որ մինչ այդ քննարկումը դիմել են Ազգային ժողովին եւ Գիտությունների Ազգային Ակադեմիային: ԱԺ-ից ստացել են պատասխան, թե պատվիրակությանը կընդունեն, երբ հարցը քննարկման կդրվի Ազգային ժողովում:
«Զարմանալի է, որ Հայաստանի Գիտությունների ազգային ակադեմիան, որը գոյատեւում է բնակչության, հարկատուների հաշվին, եւ հարկատուների, բնակչության այս կարեւոր խնդրի մասին մեզ երկու տողով պատասխանեց՝ «Գիտությունների ազգային ակադեմիան չունի ցորենի ալյուրի հարստացման մասնագետ»: Մենք չէինք գրել մասնագետ ունե՞ք, թե՞ ոչ, մենք գրել էինք լսեք մեր պատվիրակությանը խնդրում ենք, որպեսզի ճիշտ կողմնորոշվեք: Առավել եւս՝ Գիտությունների ազգային ակադեմիան հանդիսանում է կառավարության խորհրդատվական կառույց, այսինքն՝ կառավարությունը մինչեւ Ազգային ժողով վիճելի հարցեր ներկայացնելը, ցանկացած հասարակությանը հուզող առավել կարեւոր հարցերը լուծելուց կառավարությանը պետք է այդ խորհրդատվական ծառայությունը»,- ասաց նա:
Իսկ բժիշկ, մանկաբարձ-գինեկոլոգ Ֆեդյա Գսպոյանը իրավիճակը բնութագրեց ինչպես համակարգված դավադրություն: Նրան մտահոգում է համատարած ալյուրը հարստացնելու հանգամանքը. «Այդտեղ ի՞նչ մեղք ունեն չհղիացած տղամարդիկ, որ պետք է դա ընդունեն, ի՞նչ մեղք ունեն երեխաները, որ եթե հացի մեջ է լինում, նշանակում է, որ պետք է համատարած ընդունեն: Ես դրա դեմ եմ առարկում, որովհետեւ այդպես չի կարելի համատարած»:
Կարդացեք նաև
Ամի ՉԻՉԱԿՅԱՆ
