Մոշենին պատկանում է վարդազգիների ընտանիքին, բուժման նպատակով օգտագործվում են տերեւները եւ պտուղները: Հատապտուղը պարունակում է 7,5% շաքար, օրգանական թթուներ, դաբաղող եւ հոտավետ միացություններ, պեկտինային նյութեր, վիտամիններ B1, B2, PP, C, E, կարոտին: Հատապտուղներում հայտնաբերված են մեծ քանակությամբ կալիումի (100 գրամի մեջ մինչեւ 200 միլիգրամ), պղինձի եւ մանգանի աղեր:
Բույսը հայտնի է որպես ջերմիջեցնող եւ ծարավը հագեցնող: Այս առումով այն օգտագործվում է շնչառական օրգանների սուր հիվանդությունների ժամանակ:
Մոշենու պտուղներն ունեն խիստ արտահայտված քրտնամուղ եւ միզամուղ, ինչպես նաեւ թեթեւ լուծողական հատկություն: Ռուսական ժողովրդական բժշկության մեջ դեղաբույսի տերեւները եւ պտուղները օգտագործվում են աղիների քրոնիկական բորբոքումների ժամանակ: Բուլղարիայում տերեւների եփուկը օգտագործվում է մարսողության խանգարումների ժամանակ, իսկ Լեհաստանում պտուղներն օգտագործում են հոդացավերի, երիկամների եւ միզապարկի բորբոքումների, ինչպես նաեւ` հազի ժամանակ: Մոշենու գերհասուն պտուղները օգտագործվում են որպես լուծողական, իսկ անհաս պտուղները, ընդհակառակը, որպես կապ առաջացնող միջոց: Տերեւներից ջրաթուրմ պատրաստելու համար 4 թեյի գդալ հումքը 4 ժամ թրմում են 2 բաժակ եռման ջրում, ապա ըմպում 1/2 բաժակ` օրական 3-4 անգամ, ուտելուց առաջ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
07.07.2015
