Քիչ առաջ Արաբկիրի ոստիկանության բաժին եկան Մարդու իրավունքների պաշտպանի գրասենյակի արագ արձագանքման խմբի երկու աշխատակից: Նրանք փորձում էին ներս մտնել բաժին եւ հանդիպել բերման ենթարկված ցուցարարների հետ:
Ոստիկանության բաժնի դիմաց բերման ենթարկված իր ընկերներին է սպասում «Ոչ թալանին» նախաձեռնության անդամ Մաքսիմ Սարգսյանը: Նա ասաց, որ նախաձեռնության անդամները շուտով պայքարի հետագա քայլերի ու գործողությունների մասին հայտարարություն կտարածեն: Նա դեռ փակագծերը չի բացում, թե ինչ գործողություններ են նախատեսվում: Միայն ասաց, որ պայքարը նոր թափ է առնելու եւ իրենք շարունակելու են պայքարել իրենց բարձրացրած երեք պահանջներին հասնելու համար:
Մաքսիմ Սարգսյանի խոսքով՝ ոստիկանությունն այսօր ընտրեց շատ վատ մեթոդ եւ օգտվեց առիթից, որ գիշերը Բաղրամյան պողոտայում գիշերած ցուցարարները գնացել էին տուն՝ հանգստանալու եւ հերթափոխի ժամանակահատվածն էր: «Ընտրեցին այն ժամը, երբ ցուցարարների թիվը շատ քիչ էր եւ փաստորեն կրկին ուժ կիրառեցին խաղաղ ցուցարարների նկատմամբ: Հաշվի առնելով, որ գիշերն այդտեղ մնացածները պետք է գնան տուն ու նրանց փոխարինողները ֆիզիկապես չէին հասցրել տեղավորվել ոստիկանության տված ժամկետներում՝ 30 րոպեի մեջ»,- ասաց Մաքսիմ Սարգսյանը:
Նրա տեղեկություններով՝ բերման ենթարկվածների նկատմամբ ոստիկանների կողմից ոչ միայն ուժ է կիրառվել, այլեւ եղել են կոնկրետ հարվածներ ցուցարարների նկատմամբ:
Կարդացեք նաև
Արփինե ՍԻՄՈՆՅԱՆ
