Այսօր ԱԺ-ում խորհրդարանի պատվիրակությունը ասուլիս էր հրավիրել՝ Բելառուս կատարած այցի մասին: ՀՀ ԱԺ պատվիրակության կազմում են եղել Էդուարդ Շարմազանովը, Տաճատ Վարդապետյանը, Գագիկ Մելիքյանը եւ Արծվիկ Մինասյանը:
Էդուարդ Շարմազանովը նշեց, որ Բելառուսի ներկայացուցիչներն ընդգծել են՝ Բելառուսը ԼՂ հիմնախնդրի բացառապես խաղաղ կարգավորման կողմնակից է՝ ԵԱՀԿ Մինսկի խմբի ձեւաչափում: Հանդիպման ընթացքում քննարկվել են խորհրդարանական համագործակցության հետ կապված հարցեր:
Լրագրողները հետաքրքրվեցին՝ Բելառուսում չե՞ն հարցրել, թե ինչ է կատարվում այս օրերին Բաղրամյան պողոտայում: Էդուարդ Շարմազանովը պատասխանեց, որ այս օրերին հայ խորհրդարանականները բելառուսական մամուլի եւ հեռուստաընկերությունների հիմնական գործող անձինք էին. «Ես ասել եմ՝ այնտեղ այն, ինչ Հայաստանում՝ ի տարբերություն որոշ գործընկերների: Իմ կարծիքը կայուն է եւ օդային տարածքը փոփոխելուց չի փոխվում: Ասել եմ, որ սա բացառապես սոցիալական խնդիր է: Խնդիրը քաղաքականացնելը, Երեւանում Մայդան տեսնելը առհասարակ իրականության հետ որեւէ կապ չունի: Ասել եմ, որ թանկացումները բոլորիս են մտահոգում: Սա բացառապես տնտեսական, սոցիալական պայքար է սրտացավ քաղաքացիների, որոնք պայքարում են իրենց իրավունքների համար»:
Ըստ Էդուարդ Շարմազանովի, սա լավ հնարավորություն էր, որ առաջին ձեռքից տեղեկատվություն ունենային Բելառուսում ՀՀ-ից:
Կարդացեք նաև
Բելառուսում էլ հայկական պատվիրակության էներգետիկ համակարգի առողջացման համար նյութեր, իրենց լուծումներն են տվել, որը Արծվիկ Մինասյանը պետք է ուսումնասիրի:
Հանդիպումների ընթացքում քննարկվել են նաեւ տարածաշրջանային անվտանգության խնդիրները, ուկրաինական դեպքերը. «Որպես ՀՀ ԱԺ պատվիրակության ներկայացուցիչ, ասել ենք, որ մենք բացառապես Ուկրաինայում խնդրի խաղաղ լուծման կողմնակից ենք: Մենք անհանգստացած ենք, որովհետեւ այնտեղ կա մի քանի հարյուր հազարանոց հայկական համայնք: Վստահ ենք, որ սառը դատողությունը կհաղթի, ի վերջո այնտեղ էլ լույսը կհաղթի խավարին»:
Հռիփսիմե ՋԵԲԵՋՅԱՆ
