Հարցազրույց պաշտպանության նախկին փոխնախարար ՎԱՀԱՆ ՇԻՐԽԱՆՅԱՆԻ հետ
-Ադրբեջանն արդեն իսկ վայնասուն է բարձրացրել հայ-ռուսական վարկային համաձայնագրի շուրջ, եւ դա հասկանալի է: Բայց անհասկանալին մեր արեւմտամետ խորհրդարանականների վրդովմունքն է:
Ի դեպ, ռազմավարական տեսանկյունից Հայաստանի համար շատ կարեւոր այս արտոնյալ վարկի տրամադրման ժամանակ միայն Արեւմուտքի խոսափողերը հիշեցին մեր ուսերին նստած վարկային բեռի ծանրության մասին:
-Նրանց կառաջարկեի կատարել հետեւյալ համեմատությունը. Արժույթի միջազգային հիմնադրամի (ԱՄՀ) կողմից Հայաստանին տրվել է 900-ից մինչեւ 1 մլրդ ԱՄՆ դոլար վարկ: Բայց ի՞նչ են տվել այդ վարկերը Հայաստանին։ Խոսում են արդիականացումից, համակարգային օպտիմալացումներից, խորհրդատվություններից, բայց այդ բոլորը ավազի նման հոսել, գնացել են եւ ոչինչ չեն տվել Հայաստանին` բացի ավերումից:
Կարդացեք նաև
Սակայն 200 միլիոն դոլարի ռուսական վարկն ուղղվում է կոնկրետ նպատակի` սպառազինություն ձեռք բերելու համար, ինչն այնքան պետք է Հայաստանին: Բայց կան մարդիկ, ովքեր վեր են կենում ու դեմ խոսում, թե ինչո՞ւ ենք ռուսական վարկ վերցրել: Սրանք այն նույն մարդիկ են, որոնք քարոզում են, թե ամեն ինչ կխաղաղվի, եթե հայ-թուրքական սահմանը բացվի, եթե Ղարաբաղյան հարցը լուծվի` «ինչ-որ» տարբերակով, եթե Ռուսաստանն էլ տարածաշրջանից հեռանա:
Ես ուղղակի զարմանում եմ այդ մարդկանց մտածողության վրա: Այսինքն, ասում են` Ռուսաստա՛ն, գնա՛, Թուրքիա՛, արի՛: Նույնիսկ Հայոց ցեղասպանության 100-րդ տարելիցը նմաններին ոչինչ չտվեց, ոչինչ չհասկացան, թե ի՞նչ կարող է կատարվել հայի հետ: Լավ, բայց չէ՞ որ հիմա եւս նույնը կատարվում է Սիրիայի, Իրաքի հայության, առհասարակ քրիստոնյաների դեմ: Մարդիկ չեն ուզում աչքերը բացել ու նայել ճշմարտությանը, որովհետեւ միայն մի բան գիտեն անել` պատվերով խոսել: Վերջապես պետք է իրավիճակը հասկանալ, գնահատել սրտով, ոչ թե գրպանով:
-Դուք փաստորեն իրերը կոչեցիք իրենց անունով. նրանք, ովքեր դեմ արտահայտվեցին ռազմավարական նշանակության վարկի ստացմանը` Արեւմուտքի գրպանով ապրողներն են:
-Այո, մենք գործակալների հետ գործ ունենք, որոնք կատարում են վճարող երկրի պատվերը: Ռուսաստանում նմաններին անվանում են արտասահմանյան ագենտներ:
Ի դեպ, Ռուսաստանում նման օրենք ընդունվեց, ուր հստակ սահմանված է, որ բոլոր այն կառույցները, անձինք, որոնք սնվում են արտասահմանյան գրանտներով, գործակալներ են: Այո, մենք էլ պետք է իրերը կոչենք իրենց անունով:
Արմինե ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
