«Երիտասարդները քանի որ քաղաքականացված չէին, ակցիան չստացվեց: Յուրաքանչյուր նմանատիպ ակցիա ունենում է իր վերելքներն ու վայրէջքները: Վայրէջքը այս անգամ մի քիչ ավելի շուտ եղավ մի քանի պատճառներով: Նախ, երիտասարդներն անփորձ էին, չկային լիդերներ, չկային հռետորներ: Ինչպես ժամանակին Վանո Սիրադեղյան է ասել՝ մեր ուժը մեր բառադիության մեջ է, այս երիտասարդների ուժը իրենց անկազմակերպվածության մեջ էր»,- այսօր «Հենարան» ակումբում էլեկտրաէներգիայի սակագնի բարձրացման դեմ բողոքի ցույցերի մասին այսպիսի տեսակետ հայտնեց քաղտեխնոլոգ Կարեն Քոչարյանը:
Ըստ նրա, խնդիրը ոչ այդ 7 դրամն է, ոչ էլ 17 դրամը. «Խնդիրն ունի խորը արմատներ: Դա առաջին հերթին գլոբալ օլիգարխիկ համակարգն է, ընդհանուր անվստահության մթնոլորտը, որ ստեղծվել է դրա հետեւանքով: Արդարության պակասի մթնոլորտ կա, չկա վստահություն դատական, իշխանական, առողջապահական, կրթական համակարգի, ոչ մի բանի նկատմամբ չկա վստահություն, որը պիտի բերեր նման պոռթկում: Վստահությունը շաքար չի, որ իշխանությունը ինչ-որ օլիգարխի ասի՝ ներմուծի»:
Անդրադառնալով շարժման ջլատմանը, որ մի մասը գնաց Ազատության հրապարակ, մյուս մասը Բաղրամյան պողոտայում մնաց, Կարեն Քոչարյանն ասաց. «Թողեք ինչ ուզում են անեն, իրենք կգտնեն ճանապարհը: Դա պառակտում չեմ համարում, համարում եմ նորմալ պրոցես: Յուրաքանչյուր պրոցես ունի իր լոգիկան: Այդ լոգիկայի մեջ է չհամաձայնվելը իրար հետ: Ինչ-որ հարցերի շուրջ ունենալ տարբեր մարտավարություն, տարբեր ռազմավարություն: Մեծ հաշվով ես կարծում եմ, որ իրենք գալու են ընդհանուր հայտարարի: Երիտասարդներին, այդ երեխեքին, այդ տղերքին չեն կարողանալու փչացնեն, եթե իրենք իրենց չփչացնեն: Առայժմ ամեն ինչ նորմալ է ընթանում: Ասում են՝ վախեցան, ծախվեցին՝ հիմար խոսակցություններ են: Տեղական, միջազգային, թե աստվածային աուդիտը, ինչ անուն ուզում եք տվեք, եթե պարզվի՝ որոշի, որ պիտի թանկանա, այս տղերքը նորից պայքարելու են»:
Նա ասաց, որ ձմռանը թեժ ցույցեր են տեսել, եւ գնահատականները, թե ձմեռ կգա, մարդիկ դուրս չեն գա՝ ճիշտ չեն:
Կարդացեք նաև
Մեր հարցին՝ ինչպե՞ս կմեկնաբանեք երեկ Պարույր Հայրիկյանի հետ կատարվածը Բաղրամյան պողոտայում՝ Կարեն Քոչարյանը սկզբում ասաց՝ no comment, հետո շարունակեց. «Պետք է մի քիչ քթի ծակ ունենալ: Կարծում եմ, տարիքի հետ երեւի քթի ծակը կորցնում են ինչ-որ մարդիկ»:
Հռիփսիմե ՋԵԲԵՋՅԱՆ
