ՀՀ գլխավոր համաճարակաբան Արա Ասոյանն ու ՀՀԿ պատգամավոր Արա Բաբլոյանը Բաղրամյանում սանիտարական վիճակի մասին 1in.am-ին մտահոգություն էին հայտնել: Նրանք ասել էին, որ վախեցած են երիտասարդների առողջության համար՝ մի կողմից աղբ է, ով ինչ բերում է՝ ուտում են, ով ինչ բերում է՝ խմում են, 40 աստիճան շոգին աղցան են ուտում:
Նրանք հորդորել էին, որ ամեն մարդ թող իր տանը հաց ուտի, գա. «Ոչ հիգիենիկ պայմաններում սնվելը ճիշտ չի: Ես սարսափեցի»:
Aravot.am-ը այսօր առավոտյան Բաղրամյան պողոտայում ցուցարարների նախաճաշի ժամանակ հետաքրքրվեց՝ համաձա՞յն են մասնագետների գնահատականների հետ, որ սանիտարահիգիենիկ վիճակն այստեղ անհանգստացնող է:
Ցուցարարներից մեկը՝ Գայանե Աշուղյանը, որը նախաճաշ էր տալիս ցուցարարներին, միանգամից պատասխանեց՝ «Շատ բան են ասում, սուտ են ասում»:
Կարդացեք նաև
Նրանք ցույց տվեցին այն ախտահանող միջոցները, որոնցով իրենց ձեռքերն են ախտահանում սննդամթերքին դիպչելուց առաջ, վստահեցրին, որ սեղանը թաց անձեռոցիկով մաքրում են, դնում են նաեւ ձեռնոցներ:
Գայանե Աշուղյանը ցույց տվեց աղբի պոլիէթիլենային տոպրակը, որի մեջ հավաքում են այն. «Սնունդը բերում են ցելոֆանների մեջ: Իսկ երեխաների առողջությունը իրենք են քայքայում ցույցերին: Մենակ հաց ու պանիր են բերում, աղցան չկա ստեղ: Իրենք ստում են, թող սուտ չխոսեն: Ինչ սնունդ բերում են՝ նույն րոպեին թարմ, տաք-տաք բաժանում ենք»:
Ակտիվիստները միայն հորդորեցին, որ այլեւս միանգամյա օգտագործման բաժակների մեջ ջուրը չլցնեն եւ թողնեն սեղանների վրա: Նրանք ընդունեցին միայն բժիշկների այդ դիտողությունը:
Հռիփսիմե ՋԵԲԵՋՅԱՆ
