Հոսանքի թանկացման դեմ պայքարող գյումրեցի նստացուցարար Կարեն Պետրոսյանի պնդմամբ, ոստիկանները գյումրեցի 12 նստացուցարարներին բերման ենթարկելու օրը, այսինքն` հունիսի 23-ին առեւանգել են իր «Ֆոլկսվագեն» մակնիշի ավտոմեքենան:
Ըստ Կարեն Պետրոսյանի` ոստիկանները ապօրիանաբար տարել են իր ավտոմեքենան, սակայն մինչեւ օրս տեղեկություն չունի, թե որտեղ է գտնվում իր մեքենան ու ինչ վիճակում է: «Ես դիմել եմ քննչական կոմիտե, բայց ոչ մի պատասխան չեմ ստացել: Ես հիմա դիմում եմ Շիրակի մարզի դատախազին՝ հայտարարելով, որ իմ մեքենան ապօրինաբար են տարել, առանց իմ ստորագրության, առանց իմ փաստաբանի իմացության, առանց բանալիների: Հիմա չկա մեքենան, ես չգիտեմ ինչ վիճակում է: Ես դիմելու եմ նաեւ «Ֆոլկսվագեն» ֆիրմայի պաշտոնական ներկայացուցչություն, մինչեւ այս ֆիրման չհետազոտի մեքենայի վիճակը, ես այն գտնվելու դեպքում էլ հետ չեմ ընդունի», -հայտարարեց Կարեն Պետրոսյանը:
Հիշեցնենք, որ բերման ենթարկված գյումրեցի 12 նստացուցարարներից Կարեն Պետրոսյանը միակն է, որի նկատմամբ մեղադրանք է առաջադրվել ՔՕ 258-րդ հոդվածի 2-րդ մասով: Հոդվածը կոչվում է «Խուլիգանություն», 2-րդ մասը սահմանում է. «Հասարակական կարգը կոպիտ կերպով խախտելը, որը զուգորդվել է բացառիկ ցինիզմով»: Կարեն Պետրոսյանը այն շինծու գործ է որակում, որը սարքված է ոստիկանի կեղծ ցուցմունքի հիման վրա, իսկ կեղծ ցուցմունքը տալ, ըստ հավատացյալ երիտասարդի, հակաքրիստոնեական ու հակամարդկային է:
Նունե ԱՐԵՎՇԱՏՅԱՆ
