Այս պահին Բաղրամյան պողոտայում են բանակում խաղաղ պայմաններում զոհված զինվորների ծնողները: Կանգնած են դեպի ԱԺ եւ նախագահական տանող հատվածում, որտեղ ոստիկանությունը պատնեշ է կանգնեցրել: Նրանց թույլ չեն տալիս այդ հատվածով անցնել, ասում են՝ շրջանցեք այլ ճանապարհով գնացեք:
Սակայն ծնողները նկատեցին, որ այդ հատվածով այլ քաղաքացիներ անցնում են:
Կարդացեք նաև
Ծնողներից մեկն ասաց. «Գնամ, գույնզգույն շոր հագնեմ, գամ, որ թողնե՞ք, անցնեմ: Սեւ ենք հագել, դրա համար չեն թողնում»:
Հետո նրանք ոստիկաններին հիշեցրին, որ նախորդ շաբաթ Երեւանի փոխոստիկանապետ Վալերի Օսիպյանը խոստացել էր, որ այս շաբաթ անձամբ ինքը կուղեկցի իրենց դեպի նախագահական եւ ԱԺ շենք, որ դիմումների պատասխանները ստանան: Ոստիկանները պատճառաբանեցին, որ այժմ Վալերի Օսիպյանն այստեղ չէ, դրա համար չեն կարող թույլ տալ:
Ոստիկանությունը դիմեց ծնողներին, ճշտեց դիմումների ժամկետը, որ զանգեն դիմումների պատասխանների մասին տեղեկություն ստանան: Դեռ պատասխանը չեն ստացել:
Այս պահին նաեւ Բաղրամյանում են Մարդու իրավունքների պաշտպանի գրասենյակի ներկայացուցիչներ, նրանք զրուցում են ծնողների եւ ոստիկանների հետ՝ պարզելու, թե ինչու նրանց չեն թողնում գնալ նախագահական այդ ճանապարհով:
Հռիփսիմե ՀՈՎՀԱՆՆԻՍՅԱՆ
