Կառավարության առաջարկով այսօր ԱԺ արտահերթ նստաշրջան է հրավիրվել, որտեղ քննարկվում է Հայաստանի եւ ՌԴ-ի միջեւ ՀՀ-ին պետական արտահանման վարկ տրամադրելու մասին համաձայնագիրը, որը ստորագրվել է հունիսի 26-ին Երեւանում:
Այդ համաձայնագրով նախատեսվում է, որ ռուսական կողմը հայկական կողմին կտրամադրի մինչեւ 200 մլն ԱՄՆ դոլար պետական արտահանման վարկ՝ ռուսական արտադրության ռազմական նշանակության արտադրանք մեր երկիր մատակարարելու համար:
Արա Նազարյան
ՊՆ փոխնախարար Արա Նազարյանը վստահեցրեց, որ վարկի նպատակը ռազմատեխնիկական համագործակցության զարգացման համար է՝ ՀՀ զինված ուժերի սպառազինման ապահովման համար:
Հայկական կողմը վարկն օգտագործելու է 2015-2017-ի ընթացքում:
Կարդացեք նաև
ՀԱԿ խմբակցության ղեկավար Լեւոն Զուրաբյանը կասկածներ ուներ, որ այս վարկն իշխանություններն ուզում են օգտագործել էլեկտրաէներգիայի բարձրացված սակագնի փոխհատուցման համար: Նա հիշեցրեց Սերժ Սարգսյանի խոսքը, ըստ որի կառավարությունը իր վրա կվերցնի ամբողջ բեռը, գումարներ կգտնենք անվտանգության համար նախատեսված միջոցներից. «Համաձայնագիրը ստորագրվել է հունիսի 26-ին, հենց այն պահին, երբ բողոքի ցույցերը գագաթնակետին էին հասել: Արդյոք հնարավորություն տալի՞ս են վարկի պայմանները ՀՀ-ին օգտագործել այս վարկից որեւէ միջոց՝ այդ ծրագրերի համար»:
Փոխնախարարը պատասխանեց. «Որեւիցե ցենտ կամ որեւիցե լումա չի կարող ուղղվել այդ նպատակի համար: Միայն կարող է ձեռք բերվել ռազմական նշանակության արտադրանք: Ոչ միայն այս վարկից, այլեւ ՊՆ-ի բյուջեով նախատեսված որեւէ լումա չի կարող օգտագործվել այն նպատակի համար, որը դուք նշեցիք»:
Լեւն Զուրաբյանն ասաց, որ համոզված չենք կարող լինել, քանի որ չենք վստահում այս իշխանության «ազնիվ խոսքին»:
Նա ասաց, որ հանրային վերահսկողություն կա՞ այդ վարկին: Փոխնախարարն էլ պատասխանեց՝ չեք հավատում, դա ձեր գործն է, հարց տվեցիք ես անկեղծ պատասխանեցի:
Հռիփսիմե ՋԵԲԵՋՅԱՆ
