ԱՄՀ-ի Մերձավոր Արևելքի և Կենտրոնական Ասիայի վարչության տնօրեն պրն. Մասուդ Ահմեդը հունիսի 28-ից հուլիսի 1-ն այցելել է Հայաստան` իշխանությունների և այլ շահագրգիռ կողմերի հետ հանդիպելու համար: Այցի ավարտին պրն. Մասուդն արել է հետևյալ հայտարարությունը. «Շատ ուրախ էի այցելել Հայաստան և հանդիպել նախագահ Սարգսյանի, վարչապետ Աբրահամյանի, բարձրաստիճան պաշտոնյաների և մասնավոր հատվածի, քաղաքացիական հասարակության, միջազգային համայնքի ներկայացուցիչների և ուսանողների հետ: Մենք կարծիքներ փոխանակեցինք Ռուսաստանի տնտեսական աճի դանդաղման, դրամական փոխանցումների և պղնձի գների նվազման և Եվրոպայում և աշխարհում դանդաղ աճի ազդեցությունների վերաբերյալ: Մենք ուշադրությունը կենտրոնացրեցինք միջնաժամկետ հեռանկարում տնտեսական աճի բարելավման ուղիների և զբաղվածության հեռանկարների վրա:
«Կովկասյան և Կենտրոնական Ասիայի տարածաշրջանի դժվարին պայմանները և հեռանկարները իրենց ազդեցությունն են ունենում Հայաստանի վրա: Առաջիկա մի քանի տարիներին հավանական է, որ պահպանվի տնտեսական աճի չափավոր մակարդակ, ինչը կդժվարեցնի աշխատատեղերի ստեղծումը և կենսապայմանների բարելավումը: Չնայած Հայաստանի մակրոտնտեսական կայուն կառավարման փորձին, մակրոտնտեսական բուֆերների մակարդակն այժմ ցածր է, և արտաքին պարտքի և ֆինանսական դոլարայնացման ավելի բարձր մակարդակը տնտեսությունն ավելի զգայուն է դարձնում արտաքին անբարենպաստ տնտեսական զարգացումների նկատմամբ: Դրական առումով` վերջին հինգ տարիներին տեղի է ունեցել կարևոր տնտեսական վերափոխում. գյուղատնտեսության, հանքարդյունաբերության, զբոսաշրջության և ծառայությունների ոլորտներում կատարվել են ներդրումներ և նպաստել աճին:
«Հետագայում ավելի բարձր աճին օժանդակելու համար անհրաժեշտ է վճռական գործողություն: Թեև մակրոտնտեսական կառավարումը լավ է իրականացվել, այժմ ջանքեր պետք է գործադրվեն աճը խթանող կապիտալ և սոցիալական ծախսերի ավելացման և պետական պարտքի նվազեցման ուղղությամբ: Հարկային վարչարարության ուղղությամբ հետագա առաջընթացը և հարկային համակարգի արդյունավետության և արդարացիության բարելավումը լրացուցիչ ռեսուրսներ կապահովեն այդ նպատակների իրականացման համար: Կկարևորվեն նաև Հայաստանի արտաքին պահուստների հետագա ամրապնդումը, ամուր և դիմակայուն բանկային համակարգի պահպանումը և էներգետիկայի ոլորտում թերությունների վերացումը:
«Նշված գործողությունները պետք է փոխլրացվեն համարձակ կառուցվածքային բարեփոխումների իրականացմամբ: Անհրաժեշտ են շարունակական գործողություններ` գործարար միջավայրի բարելավման, տնտեսությունն ավելի բաց, մրցունակ դարձնելու և տարածաշրջանին և աշխարհին ինտեգրելու համար:
Կարդացեք նաև
ԱՄՀ-ն տեղյակ է, որ պայմանները դժվարին են և նշված գործողությունների իրականացումը դյուրին չէ: Մենք արդյունավետորեն համագործակցել ենք Հայաստանի հետ վերջին երկու տասնամյակում և շարունակելու ենք հանձն առնել օգնել Հայաստանին և նրա ժողովրդին: Շնորհակալ եմ իշխանություններին իրենց հյուրընկալության և այցիս ընթացքում կառուցողական երկխոսության համար»:
International Monetary Fund
Մամուլի հաղորդագրություն
