Էլեկտրամատակարարման ոլորտում բարդ իրավիճակ է Հայաստանում, որտեղ էլեկտրաէներգիայի սակագնի բարձրացումը հանգեցրել է զանգվածային ցույցերի: Սակագնի բարձրացումը միայն տնտեսական պատճառներ ունի եւ կապ չունի քաղաքականության հետ: Այս մասին «ТАСС»-ի հետ զրույցում ասել է «Ինտեր ՌԱՕ» ընկերության կառավարման խորհրդի նախագահ Բորիս Կովալչուկը:
Կովալչուկը հայտարարել է, որ «Ինտեր ՌԱՕ»-ն ողջունում է աուդիտի անցկացման գաղափարը. «Վստահ եմ, որ աուդիտի վերջում կարվեն եզրակացություններ, որոնք կհաստատեն ոլորտում համակարգային փոփոխությունների անհրաժեշտությունը»:
«Ինտեր ՌԱՕ»-ի ղեկավարը հայտարարել է, որ Հայաստանի էլեկտրական ցանցերի վնասները Հայաստանում գործող կարգավորման համակարգի պատճառով են եղել: Նրա խոսքերով՝ 11 տարիների ընթացքում էլեկտրաէներգիայի սակագնի ոչ բավարար չափով բարձրացումը, Մեծամորի ատոմակայանի վերանորոգումը, ինչպես նաեւ Հայաստանի հիդրոէլեկտրոկայաններում արտադրանքի նվազումը բերել են նրան, որ Հայաստանի բաշխիչ ցանցերը չեն ստացել 37 մլրդ դրամ եկամուտ:
Բորիս Կովալչուկն ավելացրել է, որ ավելի վաղ կազմակերպությունը կարողացել է փակել ֆինանսական ճեղքվածքները վարկերի միջոցով, սակայն հետագա փոխառությունների հնարավորություններն այսօր արդեն վերջացել են:. «2014 թվականի սկզբից ՀԷՑ-ի ոչ բավարար ֆինանսական միջոցների պատճառով կազմակերպությունը չունի հնարավորություն ժամանակին վճարել գեներատորներին մատակարարվող էլեկտրաէներգիայի համար եւ աշխատում է ֆինանսական կայունության եզրին»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
