Երեկվանից հացադուլ հայտարարած Հարություն Հարությունյանը եւ Հայկ Պարիկյանը Բաղրամյան պողոտայում շարունակում են իրենց պայքարը էլեկտրաէներգիայի սակագնի թանկացման դեմ: Հացադուլավորներին այսօր այցելել էր քաղաքացի Լյուդմիլա Մկրտչյանը եւ խորհուրդներ էր տալիս, քանի որ նա մի քանի անգամ տարբեր ժամկետներով ծոմ է պահել:
Տիկին Լյուդմիլան նրանց ասաց, որ որքան հնարավոր է՝ շատ ջուր խմեն, քիչ հարցազրույցներ տան, որպեսզի ավելորդ էներգիա չվատնեն, իսկ երբ շատ ուժեղ քաղց զգան՝ սեղմեն ատամները: Նա նաեւ խորհուրդ էր տալիս պարբերաբար քայլել՝ արյան շրջանառությունը լավացնելու համար եւ եթե հնարավոր է՝ դադարեցնեն նաեւ ծխելը:
Հացադուլավորների խոսքով՝ այնպես չէ, որ պարապ էին եւ սկսեցին հացադուլ. գործ, բիզնես են ունեցել, ամեն ինչ թողել ու միացել են ցուցարարներին: Հիմա էլ իրենց կամքով հացադուլ են հայտարարել՝ մտածելով, որ այսպես ավելի լսելի կդառնան:
Կարդացեք նաև
08:30-ից ցուցարարները կազմակերպեցին հանրային քննարկում, որտեղ հնչեցնում էին օրակարգի հետ կապված խնդիրներ: Մասնավորապես՝ առաջարկ եղավ երեկոյան ֆիլմի դիտում անցկացնել, կապված անհնազանդությունների եւ պայքարի վերաբերյալ:
Առաջարկներ եղան, որ ուշադիր լինեն վարվեցողության կանոնների նկատմամբ եւ «անհնազանդներին» կամ ալկոհոլ օգտագործողներին հայտարարեն սադրիչներ եւ ոստիկանությանը դիմելով՝ հեռացնեն ցուցարարների շարքերից: Նշվեց նաեւ, որ սահմանվի հերթափոխ, որպեսի եւ ցուցարարների թիվը չնոսրանա եւ անընդմեջ մնացողները չհոգնեն:
Մի ցուցարար էլ դիմելով ոստիկաններին՝ ասաց, որ Իսպանիայից է եկել եւ ցավով է տեսել, թե ինչպես են ցուցարարների հետ վարվել հունիսի 23-ի վաղ առավոտյան: Նա ասաց, որ եթե ոստիկան լիներ՝ ցած կդներ գլխարկն ու կմիանար ցուցարարներին, քանի որ նրանք եւս այս ժողովրդի մի մասնիկն են:
Անուշ ՄԱԹԵՎՈՍՅԱՆ
