Քիչ առաջ Բաղրամյան պողոտա եկավ ՕԵԿ խմբակցության պատգամավոր Հովհաննես Մարգարյանը: Ցուցարարների մի խմբի հետ նա զրուցում է պայքարը Բաղրամյան պողոտայում շարունակել-չշարունակելու մասին, ոստիկանների պահվածքի եւ այս օրերին հնչած ոստիկանապետ Վլադիմիր Գասպարյանի տարբեր հայտարարությունների մասին:
Պատգամավորի հետ բանավիճող տղամարդիկ բավական բացասական են տրամադրված ոստիկանների նկատմամբ: Մեկը նույնիսկ չթաքցրեց ու ասաց, որ ինքը հատուկ է գալիս այստեղ, որ եթե մի ոստիկան համարձակվի մի սխալ քայլ անել, ինքը դրա պատասխանը տա՝ «ոնց որ պետքն ա»:
Հովհաննես Մարգարյանը փորձում է հանգստացնել ագրեսիվ տրամադրված տղամարդկանց, բացատրելով, որ ոստիկաններն էլ մեզ պես մարդիկ են, որ 145-150 հազար դրամ աշխատավարձ են ստանում ու եթե հոսանքը թանկացավ՝ աշխատավարձի մեծ մասը վճարելու են հոսանքի համար: Հովհաննես Մարգարյանն ասաց նաեւ, որ ինքը այս օրերին այդ թեմայով շատ է խոսել ոստիկանների հետ: Վերջիններս դա լավ հասկանում են ու համամիտ են բողոքի ակցիայի մասնակիցների հետ: Պատգամավորը նաեւ պատմեց, որ ոստիկանապետին ինքն առաջարկել է, որպեսզի 2-3 շարքով Բաղրամյան պողոտայում շարվող ոստիկանները գոնե «այդ հաստ գլխարկները չդնեն, շոգ է, մեղք են»:
Մինչ ՕԵԿ-ական պատգամավորը քաղցր-քաղցր զրույցի էր բռնվել ցուցարարների հետ, հեռվից մի տարեց կին նրան տեսնելով բղավեց՝ «Վայ, ազիզ ջան, էսի հանրապետականի ամենալավ մարդն ա» ու ճեղքելով տղամարդկանց շրջանը՝ փորձում էր առաջանալ դեպի Հովհաննես Մարգարյանը:
Կարդացեք նաև
Նելլի ԳՐԻԳՈՐՅԱՆ
