«Դուք որ ասում եք մենք չենք ցրում, իրավունք չունեք ցրելու, սա Սահմանադրությամբ նախատեսված խաղաղ հավաք է»,- քիչ առաջ Բաղրամյան պողոտայում ցուցարարն այսպես հակադարձեց Երեւանի փոխոստիկանապետ Վալերի Օսիպյանին, երբ նա ակտիվիստներին սպառնաց, որ ոստիկանության համար մի քանի րոպեի հարց է նրանց ցրելը եւ Բաղրամյան պողոտան բացելը, բայց այդ «անօրինական հավաքը» չեն ցրում, ուզում են ակտիվիստներն իրենք հեռանան:
Օսիպյանը պատասխանեց. «Ցույց տվեք օրենքը: Դուք լսել եք մի բան, չեք տիրապետում իրավագիտությանը, եւ այստեղ փորձում եք դիվիդենտներ հավաքել, ցույց տաք, որ գնդապետին ինչ ասեցիք: Հարգելիս, ՀՀ Հավաքների ազատության մասին օրենքի 33 հոդվածի առաջին մասով ոստիկանությունն իրավունք ունի սա կարգի բերելու: Բացեք նայեք, դուք, որպես քաղաքացի, ունեք իրավունքներ, նաեւ՝ պարտականություն»:
Ակտիվիստը պնդեց՝ դուք չեք կարող արգելել խաղաղ հավաքը՝ Օսիպյանը վիճեց եւ հակադարձեց. «Այո, իրավացի եք, բայց ոչ անօրինական: Դուք սահմանափակել եք քաղաքացիների համաչափ տեղաշարժը, ի վիճակի՞ եք լսել: Սահմանափակել եք մարդկանց հանգստի սահմանադրական իրավունքները»:
Հռիփսիմե ՋԵԲԵՋՅԱՆ
