ԵԽԽՎ-ում ՀՀ պատվիրակության անդամները ամփոփիչ մամուլի ասուլիսին հայտարարեցին, որ ԵԽԽՎ ամառային նստաշրջանի աշխատանքները հայկական պատվիրակության համար գերծանրաբեռնված են եղել: Պատճառն այն էր, որ «Ադրբեջանում ժողովրդավարական ինստիտուտների գործունեությունը» զեկույցում Ադրբեջանի պատվիրակությունը խնդիր էր դրել զետեղել «Լեռնային Ղարաբաղի և յոթ այլ շրջանների գրավումը Հայաստանի կողմից» եզրույթը: Սակայն հայկական պատվիրակությանը հաջողվել է հասնել նրան, որ այս արտահայտությունը փոխարինվի:
ԵԽԽՎ-ում հայկական պատվիրակության ղեկավար Հերմինե Նաղդալյանը պատմեց, թե Ադրբեջանի պատվիրակության ղեկավարը ամբիոնից հայտարարել է, թե ինչ ուզում եք գրեք ու ասեք, միայն թե այդ արտահայտությունը թող պահպանվի:
Ըստ տիկին Նաղդալյանի՝ հաջողության հասան, քանի որ եռամիասնությունը՝ Սփյուռքի կառույցներ, դեսպաններ, պատվիրակություն, համախմբված աշխատեցին: Նաև հայկական պատվիրակության կողքին են կանգնել Իտալիայի, Բելգիայի, Ֆրանսիայի, Շվեյցարիայի, Գերմանիայի պատվիրակությունները:
Հերմինե Նաղդալյանը կարծում է, որ այս ամենին հաջորդելու է տոտալ մոբիլիզացիա և հետհարձակում ադրբեջանական պատվիրակության կողմից:
Կարդացեք նաև
ԵԽԽՎ-ում հայկական պատվիրակության անդամ Նաիրա Զոհրաբյանը նշեց, որ համաձայնել է այս անգամ բացառություն անել ու մասնակցել ասուլիսին, որպեսզի նշի, որ եռամիասնությունը, այն օղակը, որը չէր աշխատում, առաջին անգամ փայլուն աշխատել է: Այնուհետև նկատեց. «Մենք իրավունք չունեինք թույլ տալու, որ անկախ այդ փաստաթղթի իրավական արժեքից, սպրդի մի ձևակերպում ԼՂՀ վերաբերյալ, որը երբևէ չի եղել որևէ միջազգային փաստաթղթում: Ադրբեջանցի համազեկուցողը համաձայն էր կողմ քվեարկել ցանկացած հակաադրբեջանական ձևակերպման, անգամ այն, որ Ալիևը վերջին դիկտատորն է, Ադրբեջանի բանտերը լցված են ակտիվիստներով ու լրագրողներով, միայն թե այդ ձևակերպումը մնա: Նա բացահայտ վեհաժողովին բազար առաջարկեց պահել այդ ձևակերպումը, դրա փոխարեն ավելացնել Ալիևին քննադատող ձևակերպումը: Ադրբեջանի պատվիրակության ղեկավարը դահլիճում մատ էր թափ տալիս պատվիրակների վրա՝ ասելով, որ պետք է քվեարկեք: Նույնիսկ այն պատվիրակները, լոբբիստները, ովքեր չէին եկել, նրանց համար տոմս գնվեց, որ հասնեն քվեարկության»:
Իրենց քննադատողներին տիկին Զոհրաբյանն ասաց. «Եթե ՀՀ-ում կա մեկ պատգամավոր, որը վստահ է իր վրա, որ կարող է Ադրբեջանի կողմից պատանդ վերցված ԵԽԽՎ-ում աշխատել, ես ինքս պատրաստ եմ ԲՀԿ քվոտայով զիջել իմ տեղը: Մենք աշխատում ենք միլի մեջլիսում: Այսօր ԵԽԽՎ-ն միլի մեջլիսի դուստր ձեռնարկություն է»:
Պատվիրակության անդամ Արփինե Հովհաննիսյանը նշեց. «Մարդ էին որսում ամենուր, որ քվեարկեին այնպես, ինչպես իրենց է պետք, այլ ոչ թե այնպես, ինչպես մոնիտորինգային հանձնաժողովը, որը կողմ էր քվեարկել փոփոխությանը»:
Տաթև ՀԱՐՈՒԹՅՈՒՆՅԱՆ
